“Et nayarian yoy .... ?” kuay tepet nen Victoria.
“Oninom met na soklati? Ay on! Dapot labat no magano lay almosal......”
Maligligay kabuasan: onggagapo lan mankidkidiam so danum, a say sindag na agew ontatalus ya anggad dalem, tan malinlinew a sankanengneng so aninag na ganagana ed makaayayap iran koloi’ ya anggapon balot so burarog a singa nanenengneng no arum ed mararakep iran inpipinta.
Amin lawarin too masaysayaksak a malikeliket iran onsosungap na mapalpalayupoy a dagem na kabuasan ya onggagapon onsisiplog. Pati saramay atateng a masiadoy pasakbay da tan panagbilin da, manelelek iran manggagalawan.
“Nanunotan mo?” kuay sakey ed kinen kapitana Tica, “nanunotan mo no manaames itayo nen saman ed Ilog, nen mamarikit itini? Kasanlilikna nitan laran milmilad agos so talopak na pontin ginagawan balbaluto ya nankakargay nambabangil a bunga-bunga ya iniiyan ed utel na rosrosas. Kapag sakey a baluto walay laylay to ya angisulatay ngaran no siopad sikatayoy angitalagaan.....”
“Insan no ompawil itilad abong ey?” kuan met na sakey ya agto la apasumpal imay inmonan mansasalita; “nasabian tayon agaygaygay iramay taytay a kawayan, a nakaukolan tayoy mankasaw anto may inkapilyo ra ey?”
"Lanti!” kuanen Kapitana Tica, “siak balet lablabien kolan nabasay saloy na sapey ko nen say ompaway so salik: ta amtak a petepeteg a dimad katakelan ed pangdel et wala ray matan mantatakiling.”
Saramay mamarikit a makakangel nia mankikindatan iran makakaimis; saray arum met balet a masamsamit so tungtongan da, agda raya nanaasikaso.
Bokbukor ton may piloto so ag oneseesel tan ag balot mibibiang ed onman lan gayaga tan sayaksak. Sakeyan tubonbalo ya maong a impanlaman tan lupa toy makatawag na imano nisengeg lagi ed mata toran ankabaleg ya maerermen tan masebeg ya inkatabas day bibil to. Say buek ton andeket, andukey tan ag nana-asikaso, ngalngali lan onsakbong ed beklew ton mabisbiskeg; sankanengneng a napatnagan ed aysing ton magasal tan magket ya abel so makapal a laman ton makaka-
