“Wala met anganko, ta no andi masiado met laran masegsegang.”
Si Maria Clara agto naimanoy maerermen a tanol na bosis nen piloto ya angibalikas ira nian salita.
“Akin sirin ey?”
“Say kuanda, ali,” kuanton inmebat, “ta ag nanengneng so ubong daran tan ya manok, tan wala met so pakayari ran napanmaliw da met ya ag nanengneng so makaegna ed sikara; tan diad aliling na kamarerua ya say pakanengnengan labat et diad malinew ya salming day mata, say pakanengnengan labat ed ubong daran tan a manok diad yaninag dad danum.”
Ag inmesel si Maria Clara ya nannodnunot.
Diad say a akasabi larad samay baklad: samay bumabaluton masiken insinger to ramay balutod man ed sakey a kawayan.
“Alagar ka!" kuanen Tia Isabel ed anak ton may bumabaluton masiken a manpaparaan lan onsegep ya awitoy kawayan ya angisingeray iket ed sampot; "nakaukolan ya akaparaan lay panselaran ta piano mabilabilay niray siran ipelag.”
"Agay lay abig na linawa nen Tia Isabel a!” kua nen seminarista; "agto labay a naalis ed danum iray sirasira agla piga no anapen da.”
Si Andeng ya agi nen Maria Clara ed soso anggaman nengneng toy malikeliket a naynay a singa anggapoy aasikasoen to, bantog a maong a mangosina. Imparaan to lay inoras, kamatis, pias tan agat; saramay arum a babalolaki mibabali met iran mangiba ond mangaabala, balang lad tan, ta labay da lagin asikasoen to ra. Saramay bibii manoubak iray kalobasa, gisantis tan puputeren da ramay paayap a singa ra katitikey na sigarilyo.
Ta piano natalibaga ramay maganat lan makanengneng na sirasiran mabilay a manloklukso, inala nen Iday so arpa. Si Iday aliwa labat lan maong a manogtog na arpa no ag ta mararakep met iray garnet to ya maimuimus iran kinmakandila.
Mantipak iray tubonbalo, tan inangoban nen Maria Clara. Say arpa sakey a totugtogen a dakerakel so makatugtog ed saman a luyag, tan sikato met so makalakalat ya ikanad man.
“Victoria, kantam imay kansion a nipaakar ed bi-
—183—
