lay na walay asawa,” kuanda ranmay atateng a bibii.
Sinmungpa ramay lalaki, tan si Victoria met, anta marakep so bosis to nanbaraan ya apagas. Sakeyan kansion a mababig, balet ta marmaermen ya isasalaysay toray irirap tan kaermenay bilay na walay asawa ya anggapon balot so binitla ton bengat lan liket.
Kinerew dan mangantay Maria Clara.
“Maerermen balet iran ami kasion ko,” kuanto.
“Andibali! Andibali!” kuandan amin.
Agla impapaspasout, inala toy arpa, impasakali to, insan anganta ed bosis ton giwgiwan, masamsamit tan masensintimiento:
Ya kakaaro, pinabli, say banwa nasisindagan; Makaiter na iligsa so dagem ed kaumaan,
Patey so makapaliket, tan aroy sankatamoyan!Na maararo ya ina no diad pagew toy liingan, Bang iray taklay ed satan dia ed beklew so lakapan,
Tan saray matay onimis dia ed pakapanlimgisan.Ya say sisindagay banwa kakaaro ra ya peteg; !Et patey iter na dagem ed toon naandian balet
Na baley to ya nianakan, ina, tan aro ya maglet!Narep lay bosis, tinmonda lay kansion, amemet lay arpa et siansia nin singa ra manderengel; anggapoy tinmipak. Saramay mamarikit akaterter so lua ra, si Ibarra singa aliway liknaan to, si piloto ag onggalagalaw, a mata toray walad arawrawi.
Biglan nangel so makatelek a tanol. Akaeyag iray bibii tan nanpepet iray layag da. Si Albinon seminarista manaya, ya inyan toy anganggaay biskeg ton anibok nimay tambuyog a saklor. Pinmawil so sayaksak tan elek; tan saramay matan manlua, linmigsa ra lamet.
“Bugkalot! Labay mo kamin natelek?” kuanen Tia Isabel ya iningalan to.
“Ali!” kuay ebat nen seminarista ya mabinbinta;
“walay akangelan ko ya sakey a duka ya managtambuyog dimad gilig na Rhin(1) akaasaway sakey a biin
(1) Ilog a baleg ed Alemania.
—184—
