buyag so danum dimad tinabuyan to insan pinmawil
a sinmakob.
“Jesus, Maria tan Jose!” kuanda ranmay bibii. “Nasabian itayoy disgrasia! Jesus, Maria tan Jose!”
“Ag kayo labat mapaga,” kuanton may masiken a bomabaluto; “no walay makagawa diad lapag a luyag anggapoy arum no ag sikato.”
“Siopay ngaran to a?” kuandan tinmepet.
"Piloto labat so pananawag mid sikato; anggad natan, sikato met ingen so sankaabigan ya anengneng ko, sa labat ta singa agto kapaknay anapan to. ”
Mankibual so danum a singa bilang walay baleg a tulot ed dalem; manyugayog imay koral. Anggapoy oneseesel, anggapo lawari onlilinawa. Si Ibarra sankagemgeman ton malmalet imay putay ydron makmakdem tan magmautok.
Kasanlilikna dinmeen imay danum a singa bilang asumpalay tulot dimad dalem. Linmimuas so ulo nen piloto ya inabet na bansag ya eyag a malikeliket: saramay bibii mannangis iran amin.
Kinmalab si piloto ya sankabenbenan toy sampot ton may lubir, tan kasabi tod man ed singa intablado ed tagey na koral, ginapoan ton binira lan binira.
Binmutay ya akalimuas imay buayan ataker na lubir ya inbaliber ya amidua ed beklew to tan diad silong na sali toran kamanona. Balbaleg ya unong na imbaga la nen Ledn, tan atuboan lay lamuyak so beneg to ya pakapatnagay kinatatken to la, ta say lamuyak ed beneg na buaya kabaliksan toy uban ed saray totoo. Manngakngak a singa dueg, isiksikdak toy ikol tod man ed koral a kawayan, ipeket toray salisali to, insan to isangisangi may sangi ton andekedeket ya alay kinabaleg, a sankanengneng iray pasingil ton andurukey.
Bukbukor nen pilotoy mangitatagey ta anggapoy akanunot a mangibad sikato.
Nen nilimuas to lan aminpinsan ed danum a wadman lad tapew na intablado, ginatinan to, binenbenan ton kinupit nimay lima ton mabisbiskeg so ngalangala toran ankakabaleg, insan to tatakerey sungot toy lubir. Ipasout toy onlukpos imay buaya; inbasikaw toy balambang to, insikdak ton pinaspasiay ikol tod man
—188—
