“Say labay ton ibagan tan,” kuanton pinetek nen seminarista, “so agto asalin balot so tinmubong ed simbaan kaleganay makasalanan ya inpanbilay to. No tungtongey tua agkon balot anengneng ya akiulop ed ontan lan karakel day buayan(1) onluloob ed simbaan.”
Amaarap ira lamet sirin ed samay sakey a baklad tan angiparaan a piduay Andeng na panselaran.
Ontatayagtag lay agew; mapalpalayupoy so siplog na dagem; naliliing iray daluyon a binelbinel ed liberliber ton may buaya, tan “mansibuag na atagtagey iray burakan ya pankidiamay sinag na agew ed nambabangil iran kolor," unong na inkuanen omaanlong ya P. A. Paterno.
Tinmobat lamet so tugtog: si Iday manotugtog na arpa tan saramay lalaki, saray akordion tan gitara ya wala lad tay balibali pananugtog to, wala met lay ag makatono, et tinalo ran amin nen Albino ta andi pagsamaan ton gasgas lan gasgas na gitara ya anggapoy natunton ton kompas, mansekiaw a pinaspasia ya nalilingoanan toy totugtogen to odino igapo tod sakey a sonata kasanlilikna sananey lay isosuldong to.
Magmaalem so linawa ran sinmingger ed samay sa key a koral ta mapagpaga ran wadmay asawa ton may buayan inatey; et napnapnek so linawa ra ta kapag itagey day iket napnoy sira.
Si Tia Isabel so manggagangan a kuanto:
“Satay ayungin mananam ya isegang; satay bonor para iskabitsi; say dalag tan bulanbulan ipisa. Mabayag so bilay na dalag, kanian ipawil yo rad tan ed iket pian manayam nirad tan ed danum. Ititi tay urang! Saratay balanak ipolpog a seksekay kamatis so eges da insan balkoten irad bulong na ponti. Itilak yo ra tay arum a sira pian walay tapang ta makapoy no ekalen ya ami lugan to,” kuanton inabot.
Diad saya nanpagilig laran sinmakbit dimad takel
a kaibay daldalin nen Ibarra, ya kiew toray atatagey
a masalsalompapak tan mamasiken lara. Dimad sirum
day kakiyewan ed abay na manages a kulos tan rosrosas
so angipaalageyan iray palapala ya pangogtoan da.
(1) Say labay ton ibaga dia saray totoo ta “buaya” met so panangingaran ed saray totoon alablabas so pilalek dan mantuboy dakel tan manpayaman
a singa ag iran balot napera, ya anggan nisuri lara odino wala laray napaunong
da.
—190—
