Wala ran tinmotubod biek tan biek a gilig so rosrosas
Iran balang, ya agay lay dakep, ya anggapo ni lagi ngaran dad latin lapod tubotubo ra labat, balet ta ag napanduaruwaan a kabkabat daran maong iramay nambabangil a bigibigis a wadman íran mantektekiab, kumpapey iran nandurumaay kinakabaleg tan kolor, inanagan tan balitok, ampoti tan andeket, nanmatikmatik,
mankidkidiam, pigapigan nanlalaok a kolor, ya aliling
na payak day binobutakay rubi, esmeralda tan arum
niran baton ankabli; tan ontan met a libolibon bigibigis
a payak day singa minumokumokay pinopinon balitok.
Say angeeng da ranian bigibigis, say titit na piaes ya
ag ontutondan labi-agew, say oni ray kamanokan, say
kalasakas na sangan amagaan a nataksing tan nasagorsagor ed nambabangil a pasen, — sikaraya labat so
tanol a narengel a makaguguloy kareenan ton man a pasen.
Nanliwagliwag nid mad utel day nanlalagan tanaman a kalabkalab, ya irap toran papalpaliisan so sabisabit a kasasaguray ábito ton ginggon a singa ra ipúger komon, tan ontan met ya lelegiasan toray ankakabaleg a lamot day kakiyewan a tinmatapew ed dalin a madmainomay a kigápolan day ag apasal a manakar diman. Biglán tinmonda, ta sinmabin anggad layag toy arakak iran masamsamit tan malinlinew iran bosis a manlalapo rad mad kulos tan singa ra manasingger.
“Nengnengen ko no makalmo ak na ubong,” kuay marakep tan matamtamoy a bosis ya abirbir nen kúran tampol: “labay kon sankanengneng ya agto ak balet nanengneng, labay kon tomtumboken ed amin a pasen.”
Sinmanib si parí Salví ed sengeg na sakey a baleg a kiew a diman nantalineng.
“Say labay mo sirin a gaween ed sikato singa gawa nen kúrad sika ya banbantayan tokad amin a pasen?” kuay inebat na sakey met a basis a masaysayaksak. “Manaluar ka ta say imon makapaebeng tan makapaaralem met na matá!”
“Andi, andi, aliwan ímon, say labay ko labat lan pakaamtay gagaween to!” kuanton may akaonan masamsamit a bosis.
“On, ímon itan, ímon itan! kuanto lamet nimay sakey a manpanpandak.
—193—
