"Amta yo, sinyor alferez, no antoy nasasalita nipapaakar ed inkaandipat dai’an tan ya ugugaw? Andi?
Tepet yo sirin ed saray sondalo yo!”
"Panon?” kuanen alferez ya abalang toy liket to.
"Say kuanda ta samay labin inkaandi ra walay nangel a pigaran paltog!”
“Pigaran paltog?” kuanen alferez ya inoman a lingawlingaw ed saray wadman.
Saraya intanger day ulo ra.
Si pari Salvid satan inmebat a matantantan a naknep na masakit a balaw:
“Kuanko la ta aliwa labat lan ag yora nanaerel so manges a totoo no agta agyo met amtay nagagawad loob na abong yon dili, insan mibibiang kinin mansirmon a mangibangat ed arum a tooy nepeg dan gaween. Nakaukolan ya agyo lingoanan imay salitan "Dakdakel ni amtay ambagel’(1)......”
Sinyoris!” kuanen Crisdstomon sinmalabat nen anengneng ton pinmoti lupa nen alferez; “nipapaakar ed saya labay ko komon ya amtaen no antoy kuanyo ed sakey a kanunotan ko. Nonunoten kon patambal yan ambagel a yanapay maong a doktor a mannengneng tan mangasikasod sikato, tan kerewen ko met so tulong yo tan panangitunton yo ed pananap kod saray anak to.”
Say insabi daran may ugugaw ton agda arumog imay biin ambagel, singa to apabetel so ulo daran may duaran manbubusolan, tan sananey lay naarap na tungtongan.
Kasumpal na panangan tan legan day totoon oniinom na tsa tan kapi, nanbubuyak iray mamasiken tan tubonbalo ya agsianap na kaulop. Saray arum inala da ramay tablan galaway dama tan ajedrez, saray arum, nipis; saraman balet so mamarikit ta mapilit dan kabatey arapen, ginapoan day nantepet ed samay libron “Rueda de la Fortuna” ono “Dalig na Kapalaran” ya kuan.
“Galidia, Sinyor Ibarra!” kuanen Kapitan Basilion
mantawag ya binmilay so ulat to ta akainom na daiset.
“Labinlimay taon lan walay kulkol tayo tan anggapoy
okum a mangiter na tutol. Labayo no sugalen tilad
ajedrez?”
_________
(1) “Mas sabe el loco en su casa que el cuerdo en el ajena.” Sakeyan ibabaga ed kastila ya oniay talus tod Pangasinan: “Dakdakel ni amtay ambagel ed abong ton dili nen say aliwan ambagel ed abong na arum
a too.’
