"Tamtampol, tan apakpaknaan ko tan!" kuay ebat nen Ibarra. "Alagar kayon magano ta manpapatanir si alférez!"
Nen kangel dan wala yan galaw, amin iramay mamatatken a makatalus na ajedrez dinmago ran niliktob da may pasen a kawalaay tablero. Kabat dan maong iran manggalaw iramay duaran manarap, kanian onman lay pilalek dan manbantay a pati saramay arum ya ag makatalus et dinmarago met ira. Saramay akukulaw balet niliktob day pári Salví ya labay dan piuntengay nipapaakar ed dinidíos tan kaabigay kamarerua, et saya balet singa lági agto inpasen a lugar tan oras iman a panagtungtongan ed sarayan pamaakaran ta say kakaebat to singa aliwan matinunos tan matunong, tan lingawlingaw ed amin a pasen a nanaermenan tan nanaalipanesan, ya agto ran balot nenengnengey ontetepet ed sikato.
Ginmapoy ajedrez ed baleg a kareenan.
"No tabla itayo, agti la ituloy so kolkol tayod okuman, isuner tila," kuanen Ibarra.
Nen apaldua lay galaw akaawat si Ibarray telegráma; kinmidiam iray matá to tan pinmesiaw so lupá to met, balet ta agto nilukasan no agta nilimgis to ramay polok day tubonbalo ya manelek iran maneyag a mantetepet ed samay "Dalig na Kapalaran," insan to inatol ed pitaka to.
"Check so Ari," kuanen Ibarra.
Apilit si Kápitan Basilio ya inamotoy Ari ed beneg na Reina.
"Check so Reina!" kuan lamet nen Ibarra ya pinagiaw ton impetek so Tori to ya ag nadiwit nen kagalaw to ta yaagel na peon.
Si Kápitan Basilio agto niagel so Reina, tan agto met nisuner ta samay Arin walad beneg, kanian kinmerew na tiempon pannunot to.
"On, nayari!" kuanen Ibarran inmebat; "wala met ingey labay kon ibagad saramay arum a wadman ed saman a polok ay." Tan inmalagey ya initdan toy labinliman minuto imay kagalaw to ya pannunot to.
Si Iday sankaegnaan to may malimpek a karton ya angisulatay apataplo tan walon tepet, tan walad Albino balet imay libron melag a kawalaan day ebat.
