"Tilá tan! aliwan tua! tilá!" kuanen Sinang a makakaakis.
"Antoy agawam?" kuanen María Claran tinmepet.
"Palurey katay tinepet koy 'Kapigan kasi ituboy kalakal ko?' intelekoy dalig, et satanay, si kúran alabian (si Albinoy labay ton ibaga), 'No ontubo lay buek day patang.' kuay binasa ton ebat! Palurey katan!"
Insan to inkubibit si Albino ya saya mankeykey a manelek.
"Siopa tay akankuan ed sika sirin a tepeten mo tan a?" kuanen kapinsan ton Victoria. "Say panepet mo labat kanepegan a naalam so ontan iran ebat!"
"Tepet kayo!" kuandad Ibarran inter ed sikato may karton a malimpek nen kaasingger to. Apaabig mi ya no siopay makalay sankaabigan a ebat, rigaloan day arum. Tinmepet kami lan amin."
"Siopay akalay sankaabigan ey?"
"Si Maria Clara, si Maria Clara!" kuay ebat nen Sinang. Labay to may agto impatepet mi 'Magnayon kasi panangaro tod siak?' tan say ebat na libro. . ."
Agto nisumpal ta pinepet nen María Claray sangi to na sanduan lima to ya lupa toy amalangán maong.
"Anda dia sirin itay dalig!" kuanen Crisóstomo ya makakaimis.
Insan to tinepet "Maong kasi pawayay kanunotan ko natan?"
"Agay met lay kapoy to tan a tepet ey!" kuanen Sinang.
Pinatlek nen Ibarra, inkompronta ray númeron nala to, inanap day bulong tan dasig.
"Saray kugip, kugip ira labat," kuay binasa nen Albino.
Inala nen Ibarray telegráma ed bolsa to tan nilukasan ton lima toy manggiwgiw.
"Natan ingen, nantilá tay libro yo!" kuanton malikeliket. "Basa yo!"
"Kanunotan nipaakar eskuilaan naaprobaan, sakey analo kayo."
"Antoy labay ton ibaga ya ey?" kuandan tinmepet.
"Kuanyo man a nakaukolan a rigaloay akalay sankaabigan ya ebat?" kuanton tinepet ed bosis ton giwgiwan ed gaway liketo, legan ton papalduaen ya aapipigden imay papil.
"On! On!"
