"No ontan sirin, sikatoyay rigalok," kuanton inderew ed María Clara may pisag; mangipaalagey ak na eskuilaan day ugugaw, bibii tan lalakí, ed báley; sayan eskuilaan sikatoy rigalok."
"Satay sakey a pisag ay, antoy labay ton tan a ibaga ey?"
"Saya irigalok balet ed akalay sankaugsan a ebat."
"Siak! Iter yod siak sirin!" kuanen Sinang.
Inderew nen Ibarrad sikato may kapalduan papil insan la inmarawin masigsiglat.
"Saya ay ey, antoy labay to yan ibaga ey?"
Arawrawi la balet a malikeliket, tan intobat to lamet so panggagalaw toy ajedrez.
Nitan lay pári Salvín sinmingger dimad masayaksak a polok day tubonbalo ya manaakar a singa sananey so kawalay nunot to. Si María Clara pupunasan toy lua ton akaterter ed gaway liket to. Apaer so elek tan tinmonday tungtongan. Si kúra sankanengneng toran anggapoy nasinkaton ibaga, tan anggapo met so onesel ta aalagden dan onsalitan onona.
"Anto ya ay?" kuanton tinepet nen akasalita, ya inala to may libron melag a bubukayey daiset.
"Dalig na Kapalaran', sakey a libron panaggalawan," kuanen León.
"Agyo amtan kasalanan so manisiad sarayan gawa?" kuanto ya pinilatpilat to ramay bulong na libro ed baleg a petang na uló to.
Akaeyag iran napnoy kelaw tan singa akapasnok iramay amin ya wadman.
"Lalon baleg a kasalanan so mangidisponi agyo kayarian ya anggapoy abuloy na akankien!" kuanen Albinon inmalagey. "Pári kúra, sikatotay tatawagey takew tan isesebel itan, aliwa labat lan Dios no ag pati saray totoo."
Inpantekep nen María Claray lima to ya sankanengneng ton makakaakis imay nakdaan ed samay libron ontan lay impakapaliketod sikato ed aganganó nin oras a linmabas.
Selang ed aalagden dan ami wadman, ag inebatan nen pári Salví so inbaga nen Albino: sankanengneng to ramay mantektekiab ya apilatpilat a bulong na libro ya dinmapo ray arum dimad takel tan saray arum diad danum; insan la inmarawin mantongging a binenbenan
