toy ulo toy sanduan lima to. Tinmondan aganon akisalitad Ibarra, tan intolor to nia ya anggad sakey ed saray wadman a luganan ya akaparaan ya ingganan mantulor
ed saray binabagaan.
"Maong met ya imanla man a managsebseb na liket!" kuanen Sinang ya inmeremeré. "Say lupa to labat singa to ibabagay: 'Agka oneelek ta amtak so kasalanan mo'!"
Kayari nen Crisóstomon inderew imay rigalo tod kaaroan to, intobatoy pigagalaw toy ajedrez, balet ta diad liketo agto la makapannonunot a maong tan agto met la nanaasikasoy gagaween to. Kasumsumpalan to anta natatalo la lawari Kápitan Basilio diad gaway karakel na inkalingolingo nen Ibarra nantablá ra.
"Isuner tila sirin, so asunto tayo, isuner tila!" kuanen Kápitan Basilio ya malikeliket.
"Isuner tila!" kuan met nen Ibarra," ya anggano antoni tutol ya inter day angukom!"
Nanpasamano ran malmalet a malikeliket iran dua.
Legan daran man a duan panliliketan yan agawa ya angisampot ed sakey ya asunton abaybayag lan naksawan laray biek tan biek, agulóy liket daran may bibii tan ataktakot ira ed biglan insabi apatiran guardia civil tan sakey a sargento ya napno ray armas tan sankabenbenan day bayoneta ran nanutok.
"Anggapoy ongagalaw!" kuanen sargenton iningaingal. "Paltogen so ongalaw !"
Anggaman onia lan sebeg tan langas na panagsalita, inmalagey si Ibarra tan sininggeran to.
"Antoy labay yo?" kuanton tinepet.
"Say pangiter yod sikamin tamtampol na sakey a mauges a too ya manngaray Elías, samay piloton angisakay ed sikayo natay kabuasan," kuanen sargenton inmebat a mamagiaw.
"Sakey a mauges a too? Samay piloto? Nalilingo kayo anganko!" kuay ebat nen Ibarra.
"Andi, sinyor: sikato tay Elías ya wala lamet so balon dalem a sungpad sikato ta nilimaan toy sakey a pari....."
"Ah! sikato man siri piloto?"
"Anggapoy arum, unong ed balitan sinmabid sikami: mamapadagop kayod punsia yoy mauges iran totoo,
sinyor Ibarra.'
