Saya ninengneng ton pinatagey tan pinaleksab tan inebatan ton napnoy panlemlemew:
"Agko nakaukolan ya ipatanir tan isalaysay ed sikayoy anggan anton gaween ko! Pararawesen min pagagalangan so amin a toon ondagop ed saray punsia mi, tan sikayon dili no linma kayo dia, pinagalangan mi kayo met komon a pinarongo ya singa si alférez a manonaan yo ya dogduay oras ni labat so insipoto dia."
Tan kapangibalikas to nia inbeneg ton tinaynan.
Inketket nen sargentod bibil to, tan manlapod amta ton anggapoy nagawaan to, ginanggan to la ramay sondalo to ya sukisoken dan ami pasen a pananapan ed samay piloto ya awiton insulat ed papil so sinyas iran pakabirbiran ed sikato. Inkuanen Don Filipo:
"Imano yo ta saratay akasulat a sinyas ton tay aanapen yo ay, suston onkumpronta ed siamiran kakaplo ray taga dia. Manasikaso kayon maong sirin pian ag kayo makapaunong."
Pinmawil laran siansia ramay sondalo ya anggapoy arumog ono anengneng dan ni balutó ni anggan siopan too ya makapainap; si sargento naneremeréy pigaran salita insan sinmipot la ya singa insabi to: singa kasisipot na Guardia Civil.
Pinmawil so liket nen kasipot daran man a sondalo, ya sakey tan sakey agsitepet tan sakey tan sakey met agsibagay kanunotan to.
"Šikato man iman siri ibabaga ran Elías ya angitulak ed kinen alférez ed lwak!" kuanen León a singa mannonunot.
"Ya, panon itan? panoy inkagawa to?" kuanday maliket a mikabat.
"Kuanda ta nen bulay septiembre, sakey ya agew a pinasiay uran asabat nen alférez so sakey a toon nansakbat na kiew. Samay lansangan nanlwak ya wala labat lay makisir a nayarin dalanen ed sakey a gilig ya ustouston dalaney sakey a too. Unong na kuanda, ag tinmonday alférez no agta pinagtik toni ingey kabayo to ya binandoan to may toon onsuner. Saya agto la lági labay a pawiley inakar to la lapod belat na sinakbato, tan agto met lági labay so onkasnong dimad lwak kanian inlulotoy panaakar to. Si alférez ta pinmetang so uló to labay ton talapusen, samay too balet angoyus
na awit ton kiew ya impekpek tod uló ton may kabayo
