Diad kaimbuasan, kayári nen Juan Crisóstomo Ibarra ya niliber iray daldálin to, amaarap ed abong nen masiken Tasio.
Mareereen imay tanamanan ta saramay mangalimpana ya mantektekiab dimad liberliber na paritpit anggapó lawari gagaween dan tanol -- Atubotuboan lay lamuyak iray padir a kinalabán met na malagayaman a sinmasabi lan anggad tagey a linmilikolikod saray dorongawan, Nayarin ibagan saman ya abong et ayamay kareenan.
Insinger nen Ibarran inapipiger so kabayo tod sakey a lusek, insan nankalkalnan nanakar a kulandit lawarin binatak to may tanamanan a malimlimgas tan nengneng toy lawas nababayuboan, sinmegep ed takayan tan manlapod asabiton lukás so pinto, linmoub.
Say ononaonan anengneng to si masiken ya akaosdong ed sakey a libron singá to pansusulatan. Wadman iran nanengneng a indadatak ya inpepeket ed dingding so akamayamay a nambabangil a bigibigís tan bulobulong a nisaletsalet ed mapmapa tan dagdaan laran estante ya napnoy liblibro tan asulsulatan a papipapil.
Diad gaway pangaasikaso nen masiken ed samay gagaween to, agto naimanoy insabi nen Ibarra, tan alikas to labat nen saya et onla la lawari ta agto labay ya isturboen.
"Panon? Wadtan kayo manaya?" kuanton tinepet a sankanengneng toy Ibarra ya singa mankelaw.
"Itepel yo ak," kuanto nian inmebat, "dakel manayay gawá yo....."
"Tua ta mansusulat ak na daiset, balet ag isasambot,
(1) Aparador a pananginay libro; no arum walay kapet ton salming no arum, anggapo met.
