insán labay ko met so manpainawa. Walay kikanak ed sikayo?"
"Balbaleg!" kuanen Ibarra ya sinmingger; balet ....."
Insán to imparlas so matá tod samay libron akabuskag dimad lamisaan.
"Anto?" kuanton nikelawan. "Mangipapatalus kayoy panagsulat day totoon inmona?"
"Andí!" kuanen masiken ya angiasingger na yúrongan nen Ibarra; "agko natalusay salita ray taga Egipto ni say salita ray Copto" balet ta amtak na daiset so itsuray panagsulat da kanian sikatoy pansusulat ko."
"Sikatoy pansusulat yo? Akin ey?" kuanen Ibarra ya tinepet a panduaruaan toy nanenengneng to tan narerengel to.
"Ta pian anggapoy makabasay isusulat ko natan!"
Nengnengnengen nen Ibarran sineleng ya nonunoten tod inkasikaton díli no kasi ta nanlaring a tuá man a masiken. Inosisa ton aganó may libro pian nanengneng to no ag mantítila tan wadman iran tuan balibalin nigulgulis ono nidibujo so ayayep, malimpek, pisag na malimpek, rosrosas, salisalí, limalimá, taktaklay, etc.
"Akit mansusulat kayo sirin ey no agyo labay manayan walay makabasay isusulat yo?"
"Onaa ta say isusulat ko agko itatalagad saray totoo natan no ag diad saray totood arapen iran pasasabiyen a panaon. No saray totoo ed onkukurang a panaon natan so makabasad siak, poulan daray liblibrok a kimey na entiron bilay ko; balet ta saray makabasan manbibilay ed arapen iran panaon a mangipatalus ed sarayay gagaween ko, atagey lay kabat ono aral da, natalusan da ak tan ikuanda: 'Ag irá met manaya naugip ya amin so totoo ed kabilungetay lábin nanbilayan day laki tayo!' Say agda pakatalus na totoo natan ed sayay itsuray pansusulat ko, sikatoy makapangilaban ed saray kimey ko ed kaderal da, ya singa met agda inkaderal tan impakakonsirbay akamayamay a katuaan nipapaakar ed pananisia, ya nayarin aderalderal tan apappaandi da lara komoy nambabangil a klasi papári nen tiempo ran inmona, no ag labat nisesengeg ed agda impakatalús na dumaduma ran agamil-dinidíos a tinotumbok da labat."
(1) Sikatoyay pananawag dad saray Kristianos ed Egipto tan sikatoya met so pananawag ed salita ra tan panagsulat da.
