Ag inmesel a tampol si Ibarra, insán:
"Anton salitay pansusulat yo ey?" kuanton tinepet.
"Diad salita tayo, - tagalog."
"Nayari met sirin ya onkanan pansulat iratay dibdibujo ed salita tayo?"
"No ag labat say irap na panagdibujo ya nakaukolay dakel ya ános tan andukey ya oras, nayarin ibagan mas mainomay ya ikaná nen say abadaan na latin. Saray patanol day egipcio tan saray patanol tayo nanpapára, singa bilang say o ya diad sikatayo et sampot labat so panangikanaan ya aliwan singa diad kastila, no agta say tanol to et nanpegleyay o ya anlemek tan u ya anawet; singa met diad sikatayo, saray egipcio anggapo met so petepeteg a tanol na e ed sikara; wala met ed sikara so ha tan kha ya anggapo raya ed abadaan ya latin unong na pangikakana ed kastila. Singa bilang diad salitan mukha" -- kuanton inturó to may libro; -- "mas makalát ni pangikanák na sirá ed pangisulat koy ha nen say pangikanak na h ya latin a pigaray tanol tonyan batek ed Europa. No aliwan mabakat so pangibagá, singa bilang diad salitan hain a say h et makalnay tanol to, say ikakanak a pangisulat kapalduan lamay leon a bandad tagey, odino taloran rosas na loto ya unong ed kasil a nakaukolan. Diad panagsulat day egipcio wala met so tanol a singa ondadalan ed eleng ya anggapo yan naalmo ed abadaay latin ya intokoy ed ikakanad salitay kastila. Omanen ko lamet ya ibagá ya no ag labat say irap na mandibujo ya nakaukolan ya apipigden, nayarin pangisulat na tagalog so dibujo. Saya balet a irap singa akapaabig ta napasuot ak a mangisulat labat na nakaukolan tan kapilpilitan; sakey ni sayan kimey singa bilang onkakanan ibak no onsipot laran ontekiab iray mitotondá diad siak a manlalapod China tan Japon."
"Panon?"
"Ag yora sirin narerengel? Saray sankailik, saray mangalimpana; sayan taon ag akapawil so sakey; anganko narel na sakey a pilyon ugaw ya intsik odino japon."
"Panoy pakaamta yon manlálapo rad saratan a bansa ey?"
"Onia ay: pigay taon la natan a kasakbayay isisipot da sisingeran korad salí na papil a melag ya angisulatay Pilipinas ed salitay inglés manlapod dakel so makatalus
