Akaimis na samet si Ibarra, wala ray inala ton papipapil ed pitaka to tan nankuan;
“Nen mabilay nira di amak, mabetbet a wala ray ipapanon dad sikayo tan nanunotan kon petepeteg ya anggapon balot so nagbabawian dan tinumbok a bilin yo. Walay magter a pamaakaran a nunot kon igapo tan labay ko ya nasiguroy maong a kasumpalan to.”
Diad antikey a salita, tinongtong nen Ibarra ed kinen masiken so kanunotan ton pangiletneg na sakey ya eskuilaan a panaralan day ugugaw, ya innunot to yan singa rigalo ed kaaroan to, tan inbuskag tod arap nen napnoy kelaw a masiken a makabat so piano ran apasabi ton nanlapod Ibale.
“Labay ko komon ya itunton yo ak tan iturd yod siak no siopa ray manonaan a totoon singgeran ko diad baley tayo ya aleey maong a linawa ra, ta pian diad igampi rad sayan kanunotan ko et nasiguroy maong a kasum palan to. Kabat yo ran amin so totood sayan baley tan amtak a peteg a kabat yo met so walnay sinansakev; siak kasabisabik dia, tan aliling ko lawari dapo ed dilin baley kon nianakan.”
Si masiken Tasio akanangis ed gaway liket to nen ousisaen to ramay piano ya inbuskag nen Ibarra ed arap to.
“Say kanunotan yon gaween sikatoy abayag lan pikugip ko — abayag lan kugip na sakey a masegsegang a nanlaring!” kuanen masiken a masiadoy impakasibeg to; “tan natan say ononaonan ibilin kod sikayo so ag kila dia ompapawil a balot a mangipanon ed siak!”
Ninengneng nen Ibarra ya nikelawan.
“Kuanko ya, ta ompano saray totoon makalakal,” kuanton intuloy ed tonoy bosis ton napnoy pait tan pasiki, “et ipasen da kayo met a nanlaring. Saray totoo ipapasen dan nanlaring iramay dumay panagnunot dad sikara, kanian ontay pangipapasenan dad siak, tan saya
pisalsalamatan ko ta abagey ak la! no nasabi agew ya onlad ulo ran ipawil so kalakal ko; ta diad satan ya agew ekalan da ak balet na melamelag a pankanawnawa ono kawayangan a nalak kalamor a salat bilang na impangekal dad siak na kalakal tan pangipapasen dad siak a nanlaring. Insan sakey ni, siopa tay makapangibagan petepeteg no wala rad pankatonungan ono andi? — Dumay panbibilay ko tan panagnunot ko ed saray ganggan a totumboken da; saray totuntonen ko tan saray
