pirawat kon dápaten duma met ira. Nengneng yoy Kapitan, bantog a maktek so panagnunot to, ta anto ey, lapod say inaral to labat et manggaway soklati nen pári Dámaso tan mantepel na inkaalipogpog tonia, natan mayaman, wala nid lima toy deen ono kaguloy bilay day kabaléyan to, tan no arum ni ingen et mansalsalita met a nipaakar ed katonungan. 'Sikatotay toon makabat!' kuanday karaklán, 'nengneng yo, anggapoy ginapoan to, atagtagey so asabi to.' Siak balet nianak ak ed inawa, tinawir kod saray ateng koy aliwa labat lan kayamanan no ag pati pananeleng day totoo ed boleg mi, nanaral ak; natan balet anggapoy kerán kuartak, manbibilay ak ed kasegsegangan tan anggapoy anggan anton bengat lan melamelag ya impiyad siak na báley a kimey, tan kuanda ni ingey totoo: 'Ambagel itan a too; agto amtay manbilay!' Papangaranan to ak nen kúra na pilosopo ya panlulórey, tan ipapatalus ton labir ak a labir anta andi kakabaliksay ibabagak ta
ipapangtak so inaral korad Universidad, anta no tungtongey tua, amin iramay inaral ko anggapo met so kakanaan dad siak. Nayari met ingen a siak a tuay nanlaring tan sikaray walay kalakal siopa tay makapangibagay katuaan?"
Tan si masiken impeyeng toy uló ton singa pangiarawi to bilang na sakey a kanunotan tan inkuanton intuloy;
"Say komaduan ibilin kod sikayo so ipanon yo tay kanunotan yo ed kinen kúra, si kápitan, tan amin iray totoon walay bebenbenan dan betáng. Nayarin saray iter dan bilin ono ibangat dad sikayo et makapoy odino andi kakanaan, balet ta say mangipanon aliwan kabaliksan toy ontulok; ipatnag yo labat ed anggaay nayarian yo ya totumboken yo ra, tan iparungtal yon totuntonen yoy ibabangat dad sikayo."
Nannunot ya aganoy Ibarra insan inkuanto;
"Marakep so bilin yo, balet ta mairap a tumboken. Akin agko nayarian ya ilulot yan kanunotan ko na agko tan gaween? Ag pa lági nayari ya ombolaslás so maabig, ya italirak ton amin so nadalán ton makasbel, ta say katuaan man et ag met nakaukolan a yamot ono sániban a mibayes na kawes ed kalilingo?"
"Anggapoy malabay a mandengel na butarbutar a katuaan!" kuay ebat nen masikan. "Maong labat itan
