ed nunot, tan nayari labat a tumboken ed panagbilay ed mundo ya pikugip day tubonbalo. Nengneng yo lay inkagawa ton may maistro ta kabat yo met. Masiadoy pilit to kalamor a manggaway maabig et anganggad nála toy balaw, tan elekan da ni totoo. Kuanyod siak ya aliling yoy dapo ed dílin baley yon nianakan tan manisia ak. Nanlapod samay inmonaonan agew ya insakbit yo, ginapoan yo lan pinasákitay pasirayew na sakey a pári ya ipapasen day totoon masantos, tan makabat day papárin agági to. Oy la komon no saman ya agawa et agto la atutolan so arapen yon bilay. Anggaman saray dominiko tan agustino et balbalawen daray pransiskano ed itsuray panagkawes da, say ábito ran ginggon, balkés dan lubir tan agda panmimidias; tan anggaman anunotan ya aminsan na sakey a makabat a pári ed Sto. Tomas (1) a si Papa Inocencio III et imbaga ton saray totuntonen daran ganggan na órden da et mas makalat niran ipakanad saray báboy nen saray totoo, agyo lilingoanan a mantatabon iran amin a mantotulongan no nipapaakar ed pangipanengneng da na inbaga lay sakey a procurador; 'Say sankaandi kakanaan ya oldog (2) mas ni pakayari to nen say Uley tan amin a sondalo to.' Cave ne cadas. (3) Baleg so pakayari balitok. Nanunotan yo anganko ya samay kilaw a balitok et aminpiga toran apabeneg so israelita ed Dios, a saya nanlapó lad inmonan panaon ed tiempo nen Moises."
"Aliwa lan ontan so bilunget na pakanengneng kod nagagawa tan kipapasen natan ed báley tayó, tan aliwa met lan ontay isip kon kaatapay panagbilay ed díli tayon bansá," kuanen Ibarra ya makakaimis. "Diad pakaisip ko labat ta saratan a pága singa lara alablabás, tan mailalo ak a nasungpal koray kanunotan ko ya anggapoy nasagmakan kon mabiskeg ya kasusumlang a manlapod sikara."
"On, nasungpal yo ray kanunotan yo no abubonan da kayó, ya awaten ed lima kuan la bilang, tan anggapoy nagawaan yo no ikbanan da kayó. Amin day sagsagpot
(1) Say Colegioy Santo Tomas inletneg nen taon a 1619 a say angigapoan saray liblibro tan kuarta ya impatawir a intilak na Fray Miguel de Benavides a dominiko, met, tan komanduan arzobispo na Manila. Nen taon a 1645, nisesengeg ed ganggan ya impaakseb na Ari ed España tan say Papa, nanmaliw, ya Universidad.
(2) Saramay malabay a manpári et agda nayarian ta makapoy so uló ra, akakawes met iray ábitoy pári balet ta ag ira makapanmisa tan agda nayariáy mangonpisar.
(3) Manaluar ka ta ompan napaktak ka ed pakauley.
