yo nabará ran singalday insitdak a nabuybuyak ed dingding na konbinto, no say pári et galawen to labat lay balkes ton lubir ono ipayag toy daiset so ábito to. Si
Alcalde, diad bengabengat lan baraan babawiyen ton isuner nabuas so ayari lan inabuloy tod sikayo natan; anggapoy inán mamaurong ed anak to, tan amin day kimey, tan sagsagpot yo, aliwa laingey kasumpalan da, ta ekalan day biskeg na linawa ray arum a malabay naanin ontumbok ya ontalek a mangigapoy makana tan marakep iran pamaakaran."
"Ontan man," kuanen Ibarra, "agko la nasisiay ontan lan kinabaleg na pakayari ya ibábaga yo, tan anggano akoen tayo nin ontan, mila nirad siak a siansia so mibabáley iran maktek a panagnunot, tan mila met ed siak so Uley ya marakep so gegemtan to, balbaleg so ilalo to, tan pirawat to lawas so kaabigay bansa tayon Pilipinas."
"Say Uley! Say Uley!" kuanen masiken a pilósopo ya makalkalna, ya intangay toray matá ton sankanengneng toy bóbiday abong. "Anggan antoy pilalek ton mamabaleg tan mamabolaslás ed sayan bansá ya onkanad aliwa labat lan kaabigay bansán díli no ag patí Iná tayon España; anggaman wala niray makasasabi dian manouley ya agda ni alingoanan so marakep a panagnunot daray Ararin Católico (1) tan mumorekdeken da ni rayan atagey a panagnunot ed inkasikaran díli, say Uley anggapoy nanenengneng to, anggapoy narerengel to tan anggapoy nanaitdan toy tutol no ag bukor labat na ipanengneng, ipangel tan patutolan ed sikatoy kúra, ono say Provincial.(2) Alutolutod linaway Uley a say bilay to walad lima ray papári; ya manalalagey lapod sesekderan da; ya manbíbilay ta aabuloyan dan manbilay; tan diad agew a paulian dan ag tulongan, natumbá, nalespak a singa sakey a tootoon panangisalíay kawes ya inekal so tukol to. Say panagtaktakot day papári ed Uley, say onalsa ray totoo, tan say panagtaktakot dad saray totoo, say biskeg na Uley. Sikatoyay sengegay gagaween dan yanoyanon galaw a milublubayan ed nagagawa ed saray payákot no onla ran ondalaw ed pasen
(1) Si Arin Fernando tan asawa tor Reina Isabela ya sikaray amabaleg tan amabolaslás ed nanariay España, kabat ira ed awaray España ed ngaran dan "Los Reyes Católicos."
(2) Say makauley na kapag sakey a togiop day papári diad Pilipinas, Singa bilang say makauley day dominiko, provincial day dominiko; say makauley day Agustina, provincial day Agustino, etc.
