iran ambilunget tan makapakebiew; napapaanyani ray anino ran díli tan nababaloan dan nambabangil a bosis so anieweng na bosis da met lan lamang. Anggad say Uley et ag ontalek a mitalosan a petepeteg ed báley, ag naoman yan kipapasen, ag makaalis ed silong na pakauley da; manbilay lawas a singa saramay ugugaw ya alablabas so takut dad saray manbabangat ed sikara, ya
manggiwgiw lara ed anggan pakangel da labat na bosis dara nia, ya singa ran lanang mipapayabol kalamor na maong a pantrato ed sikara. Say Uley anggapoy kukugipen to ono iilaloan ton mabolaslas ya arapen. Say kipapasen to singa taklay labat bilang, a say uló say konbinto. Nisesengeg ed sayan agto igalaw a kabaliksan toy singa anggapoy walad sikato ya papaulian to labat
a singa ra isasagarsagar ya ipapalalbong a manlapod sakey a lipnok ya anggad ontumbok a lipnok, nanmaliv lan singa labat sakey ya anino ya anggapo lay inkasikaton dílí, tan malétey ya anggapo lay nagawaan to, tan nakaukolan ya ipiya to lan amin ed totoo ran anganggad manpayaman labat so manaarid uló ra. Anggano ipara yoy kurang na Uley tayo dia ed saray arum a bansán dinadalaw yo..
"Ah!" kuanen Ibarra, "masiado met la no anapen tayoy mipára ed sikara; nepeg tayo lan panliketan a say báley tayo et ag oneeyey a mandadalem tan ag met manlíliknay irap a singa saray báley ed arum iran bansá, tan saya utang tayon linawa ed Religión tan say abig na linawa ray manouley. . . . ."
"Say báley ag oneeyey a mandadalem ta anggapoy bosis to, ag onggagalaw ta ag makagalaw a singa aberberber so kalamanan to ra odino singa walad kaitlekay ugip, tan kuanyo ta ag maniirap ta agyo nanenengneng so pandalay puso to. Balet ta nasabi agew a nanengneng yo yan onaagos a dalá, tan narengel yo met so eyey to, tan diad satan, pangaskasiyan la ramay say angipanekan day biskeg da ono say panlalapoay biskeg da et say ag pikakabat, say ag impakaaral, tan say alablabas a pananisia ray totoo, tan ontan met a pangaskasiyan laray manbibilay a mainawa ed panaglames, panaglóko rad kapara ran too, tan gagaween day panaglabay da ed
kabilungetan ta inisip dan naugip ya amin iray ibiba ra! Diad isabí panaon a saray totoo et nabilibilí dara yan kipapasen, ontongangá rad makapataktakut a ka-
