totongangá. Say ontan lan biskeg a nimermer ed lasuslasus taon, ontan lan karakel na samal ya atiptipon a nanterterter a tonggal daraiset, ontan lan karakel na
tagleey ya ag akabesngaw, ompaway iran ag napasungsongan a singa binmetag a bolkan . . . . . Tan nibaga yod siak pa lági no siopay manbayar na ontan lan kabaleg na utang ya isingil na apaunong a báley, kasisingil yan aminpiga lan dinmalan ed arum iran bansá ed nanduruman panaon ya onsasabid sikatayo ya bibiniey awaran ed bulóng toran naames na dalá?"
"Say Dios, say Uley tan say Religión agda abuloyan a nasabi tan ya agew!" kuanen Crisóstomo ya inmebat, ya agto apukpokay inkatenyeg na liknaan to. "Say Pilipinas sakey a bansan masantos, mapeket so linawa tod Dios tan inaro toy España; tan say Pilipinas kabat ton petepeteg so amin a kaabigan a gagaweey España ed sikato. Tua ta wala ray lamés a nagagawa, wala ra met so kakapoyay onkukurang ya Uley, agko met ya paandien, balet ta say Iná tin España mankikimey pian nauman iraya, pian napasimbalon napaabig iray ag makaná, mannonunot no panoy panggawa diay maabig iran pamaakaran, agto itayo met sisibletan."
"Amtak, tan sikatoyay lalon mauges. Saray panguman ono pamasimbalo ya manlalapod tagey, manmamaliw iran andí kakabaliksan no onsabí ra dia, nisesengeg ed mauges a walna ray wadian manouley, a singa bilang say pilalek a manpayaman ed antiktikey a panaon, tan say kamangmangan na báley ya abuloyan ton palabasen ya amin. Anggapoy kakanaay ganggan ya ipaakseb na ministro tan pinirmaay Ari ya pamaabig ed kipapasen tayó no anggapoy petepeteg ya walay pakayarin maseet a mannengneng no kasi ta nasusompal iman a ganggan ono andí, tan no ag ira naitday pankanawnawa so totoo ya mangibesngaw na liliknaen da tan mangidalem na lamés iran gagaween day manouley a nasnaspot ed pakayari; saray maabig a pamaakaran, maabig a pamaakaran labat irad salita tan diad papil ya angisulatan ed sikara, saray nagagawan lamés ag met ira ontunda, diad España balet maligeligen so ministro (¹) ya mareereen so ugip to ta inisip ton akagawa lay balbaleg a kaabigan. Wala ni lalon mauges nen saya, no bilang ta walay makasabí dian manuley ya atagey so
(1) Sekretario natan.
