tan nakaukolan met na bansá, tan nabibilibili da laray nabebetangan dan susungpalen, onsipot lara. Et singa akaarawi itila balet a maong ed totungtongen tayo. . . ."
"Mayani, kasakbayan tayon pawilen so sasalitaen tayon gendat, wala ray labay ko komon a paliwawaen," kuanen Ibarra ya napnoy pilalek. "Akoen ko ya say Uley et agto kabat so báley, balet ta lalo ni ag pikakabat na báley ed Uley. Wala ran tuay manouley ya andi kakanaan da, ya anggapoy nagagawaan dan kaabigan, mauges nira ingen no sikatoy labayon ibaga, balet ta wala ra met so maong, tan no saraya et ag irá makagagaway maabig andi arum a makasengeg no ag say báley lan lamang, saray totoo ya agda labay so onggalaw, anggapoy labay dan gaween, agda labay so mansakit na uló, ya mibiyang tan asikasoen iray nepeg dan pibíyangan tan asikasoen. Balet ta aliwan sikatoya lanti inakaran ko dian piuntengan ed sikayo. Linmaak dian mangipanon a paibangat ed maong a gaween ko, et say kuanyod siak so ituwek koy ulok ed díosdios iran aliwaliwa.."
"On, tan omanen ko lamet ya ibaga, ta dia nankadkadua so nayari: ono ituwek so uló ono papútol."
"Ono ituwek so uló ono papútol?" kuanen Ibarran inoman a mannodnunot. "Mairap met a panpilian. Akin balet et ontan ey? Agta nayarin manulop so panangarok ed dilin báley kon nianakan tan say panangarok ed España? Nakaukolan sirin so manpaabeba ta piano nipasen so toon maong a kristiano, ilakoy dilin konsiensia ed panggaway maabig? Inarok so dílin báley ko ya Pilipinas ta sikatoy angiter ed siak na bilay ko tan liket ko, tan sakey ni siopaman a too kanepegan ya aroen toy báley ton nianakan; inarok so España ya báley day atáteng ko, ta anggan anto ni nagagawa, agtayo napaandi ya utang na linaway Pilipinas ed España so liket to tan say bolaslás na arapen to; siak katoliko ak, inapiger kon agkon balot binenegan tan inwaklit so pananisia ray ateng ko tan agko nanengneng no antoy makasengeg na pangituwekan koy ulok anta nayarian kon itangwa, tan akin et onsuko ak ya onabuloy a papatey anta nayarian koran patuloken?"
"Nakaukolan ya ontan ta say dálin a labayon pantaneman walad lima ray kakabusol yo, tan anggapoy
