nagawaan yod sikara ..... Nakaukolan a manpinsiw kayo ni ed satan a lima ya ....."
Ag apasumpal nen Ibarra tan sinmalabat a pinmetang so uló to:
"Manpinsiw! Alingoanan yo la sirin ya sikaray amatey ed kindi amák, insan da ni impakutkot so bankay ton impaekal ed lubok to . . . . . et siak, ta siak so anak, agko nalingoanan; tan say makababaat labat ed siak ed ibales ko say panamagalang kod Religion!"
Intuwek nen masiken a pilósopo so uló to.
"Sinyor Ibarra," kuanton inmebat a matantantan, "no agyo nalingoanan iratan a linmabas ya agawgawa tan agko met nayarian ya ibagan lingoanar yo lara, agyo la itotuloy itay kanunotan yo sirin, anap yo lad arum a pasen no antoy pakatulongan yod saray kabaleyan yo. Satan a kanunotan nakaukolan toy sananey a too ya manggawa, ta diad pangituloy aliwa labat lan kuarta tan panggabay so onkaná; diad báley tin nianakan, nakaukolan met so pangilingoan ed inkasikan díli, sekder, tan pananisia, ta say dalin mabató tan agni apalinan, napno ni sabit."
Natatalusan a peteg nen Ibarra so kakanaan dara yan salita, balet ta agto iter so linawa to. Sankanunot toy María Clara tan mapilit ya manungpal na ayari to lan insipan.
"Diad inpakatalitali yo lad bilay tan inpakaimaton yoy kurang na panaon, anggapo lay nanunotan yon mamainomay a tumboken nen say inbangat yod siak?" kuanton tinepet na makalkalna.
Binenbenan nen masiken ed taklay tan insingger tod dorongawan. Onsisiplog so ambetebetel a dagem; tan singa binmuskag ed matá ramay maligan tanamanan ya aliktob na takel.
"Akin ta no aligen tayo may malétey a tanaman ay, a nalpey na mabusbuskag iran rosas tan pusó?" kuanen pilosopo ya inturó toy sakey a marakerakep a rosal.
"No onsiplog so dagem itumbok toy sengeg ton itewek ya singa to yamot ya isanib iray aawiten ton rosrosas a nagnap ed dakep. No satan a melétey a sengeg et manpetepetek a sumlangen toy dagem, naputer, nisibsibuag iray rosas to, tan natatan pati saray pusó ni. Kalabas na dagem, ibangón to lamet so sengeg to ya napnoy kinon ed kayamanan ton marakerakep. Siopa bilang so
