manetel ed sikato ey ed inpangitewek toy sengeg to nen nakaukolan ya ontewek? Nengneng yo met imay balbaleg tan masalsalompapak a kupang a mabinbintay waswas day sangasangá ton panoubongan day ágila. Nen inalak itan ed takel ya inalís kon intanem dia, melamelag ni; pigay bulan a tinotukol koy binabalsig a kawayan so maletletey a sengeg to. No baleg la angankon inalís ko dia, anggapoy duarúwan ag abilay: tinomba la komoy dagem kasakbayan day lamot ton makapeket ed dálin, tan kasakbayan met na dálin ya inmawet ed liberliber to ya makapangipuger ed saray lamot
to pian ag ira nabikual tan naawit day belat to tan kinabaleg to. Ontay kasumpalan yo ya aliling yoy tanaman a binmaleg ed Europa insan dia inalís. Say dálín dia mabató tan no ag kayo mananap na napeketan yo ya ag kayo manpaoyamo, nabual kayon natumba, Mairap so kipapasen yo, bukbukor yo, ya wala kayod atagtagey; say dálin manyugas, manasingger so bagyó
tan anengneng la ya say tuktok na kiew na boleg yo et mainomay a terakay karol. Aliwan bayáni no agta angap so isumlang a bukbukor ed amin ya onkukurang ya ag man nauman; anggapoy manetel ed sakey
a piloto ya ipireg toy sakayan to ed doroongan no nitan lay bagyó; say idapdap no onlabas so bala aliwan kapayotian; say mauges no sabaten insan ka natumban agla ombangon."
"Diad pakaisip yo ta diad pantepel ko naalak so panpilalekan kon nagamoran?" kuay tepet nen Ibarra; "manisia kasi ed siak si pári ya nalingoanan toy inkabaingan to? Tulongan daak kasin andi gimor ed pirawat kon bolaslás na panagbangat, anta say kalukasay matá ray karaklan tan say itagey na aral day totoo et kabaliksan toy naparaisetan so pilak ya ontutubong ed konbinto? Ag ira kasi mankonkuanan a mikaáro, ya ipatnag dan singa aabubonan tan totulongan so kanunotan ko, insan da balet pasíkutan ya mankimey iran ag palikas a sumlangen, da, pakapoyen da, latakan dad beneg ta diad ontan et mas mainomay a natumba nen say bakalen dad araparapan? Unong ed saray inbabaga yod siak, anggapoy ag nayari ed sikara!"
Ag akasel si masiken. Nannunot ya abayag insan nankuan:
