Asabi komaplon agew na Nobiembre ya díspiras na pistay báley na San Diego.
Unong na naugaliyan, say entiron báley ya anggapoy kitakitaw ton sakey taon biglan linmigsá. Amin a too manpaparáan tan mantatadiá: diad kaabongan, diad saray lansangan, diad simbaan, diad bulangan tan pati diad paway na báley. Pinaparakep iray dorongawan na laylay tan palagaygay ya nambabángil a kolor; tanol ed biek tan biek, togtog dia, togtog diman; pati say dagem ya susungapen singa napnoy sayaksak tan liket.
Saray mamáríkit ed kaabongan, aapígeren da la ran idadatak ed lamisaan a melag ya inapisay mantilis ya ampotín binordaan, so nambabángil ya bongabongad bansa ya ginagawan masamit, tan iniiyan ed pananginan iran mararakep a salming a nambabángil a kolor. Diad arapán mansiak iray siwsiw, mankakak iray nganak tan manngekngek iray báboy, ta natataktakot irad onmanlan sayaksak tan liket day totoo ya agda pasal ya nanaimatonan. Onsegep onakseb iray igaganggan ya sankaawit day lipong iran pinipintaan ed gilig na
kolor na balitok, tan kubiertos iran pilak; wala lad tay napanpapasnokan ya igaganggan ta akapisit na lipong; wala met lad tay elekan dan biin taga uma ya inmorong ed báley. Mansasangalay ganggan ed amin a pasen, manóupitan iray totoo, wala ray maningal ya manbabandoan, wala ray mantotungtong, wala ray mantatalabutob, wala ray mamaparles no anto ra kasi nagawa, manlalayatan iran amin, kanian tanol tan gulón baleg ya dakel lay ag mantatalusan. Tan amin yan pilálek, amin yan sagsagpot, amin irayan tadiá, andi arum ya panginonunotan no ag say ondawes a sankaili, kabkabat may andi; panankaili ed siopaman a too ya anggan agni anengnengneng ya balot, tan nayari met ya aglá
