napiduan nanengneng; ta piano say taga arum a bansá, say manlapod arum a báley, say kaaro, say kabusol, say pilipino, say kastila, say mairap, say mayaman, ya ondágop a mipista et onsipot iran napnapda tan malikeliket. Saray akanabong ya mantatadiá agda met ingen iilaloan ya saray pinarawes da et ipasen dan utang a linaway impansankaíli ed sikara, tan anggapo met so
ilalo ra bilang ya lapod abig na linawan impatnag ed sikara et agda pasákitan natan may kapigan so boleg ya anankaílid sikara. Saramay mayaman ya nagagatinan day Ibale tan dakel lay anengneng da tan amta ra nen saray kabaléyan da ran arum, nansasaliw iray cerveza, champagne, tan arum niran nambabángil ya nengneng na álak, tan ontan met na kakanen iran nanlapod Europa ya ngalngalin agda met iraya natawayan ta ipalabí dan amin ed saray sankaíli ra.
Say lamisaan dad satan napnapnoy tadiá. Diad pegley wadmay sakey a konwarin bongay pinya ya alay dakep na inkaalig to ta ngalngalin nabaloan ya bongan peteg. Dia ra impapanek so panagingat ya kimey da ray periso ed oras komon ya panagpainawa ra. Indadatak iran balibali ya ginawan singa abaniko, nankokumpog a rosas, manok, bulong odinó gulonggulong ya inbangbang iraya ed saksakey a puter na kiew ya makapakelaw so impaway dan onman lan dakep anta kuintay apasout iray nanggawa ya ayura labat so walan inkana ra, tan alenleneg ya ligliwa ran mankikimey so bosis na masebeg a manbabantay ed sikara. Inlíliber ed sayan pinyan tatawagey palillera so kalap iran pananginay bongabonga ya wadman iran manlaglagtout ya inaapiger a inlulugan so lukban, dalandan, naranjita, lansonis, atis, chiko tan pati mangga, ya anta nobiembre ni labat. Ontumbok ed saraya so ankakabaleg a bandijado ya inaapisay papil iran nambabángil a kolor ya inaabotabotan ya singa ra binordaan, ya anginan na jamon iran nanlapod Europa tan China, pastel" ya balbaleg ya singa itsuray Agnus Dei ono malapati, ta aaligen day Espiritu Santo lági, pábon sinobuan tan arum niran potaji, insan insaletsalet iray garapon ya anginay panagpasamit na panangan tan panagekal na singla ya atsaran rosas na bua tan arum niran pisipising
(1) Nanlalauk ya karnin inggisá, singa bilang manok, baboy, hamon, soriso, ya sinakobay minasan arina insan inorna.
