tan bongabongá ya tinetegteg na mararakep tan indadatak iran inpepeket ed giliggilig na dalem dan may garapon ya anginan.
Saray silew a globo ya nantatawiran laran nanlapo nid saray lakláki ran inmona, nililinisan met iran maong a pinapasileng iray gansan parakep da, sara met so ankakabaleg ya lamparáan a petróleo ineekal irad supot dan kondiman, ya angisupotan ed sikaran sakey taon pian ag irá pandutakay apangat tan agéyet, supot iran akasengeg met balet na agda inkikanan abaybayag. Saray inbibitinbitin a parakep da ra nian silew ya salming iran makakapal a singa inkatabas na bato ran ankablí, manbaybayes iran mantatankiyan a masamsamit so tanol dan singara mangankantan mililiket met ed pasásabien a pista tan onaaninag irad ampotín dingding a manlalapod sarayan salming so marakerakep iran kolor na bunlalakaw. Saray ugugaw manliliket met iran manggagalaw, uusilusilan dan sisingsingkaten iramay kolor ya onaaninag ed dingding, mantotopaan ira, napisit iray nataltalapos dan tubo, balet ta agya makabaat ed liket na pista. No arum pa lági ran agew na taon so pakapisit da, nanengneng ed pannangnangis day naawat dan dusá.
Ontan met ya ompaway irad atolan so kimey day mamárikit: pandong iran ginagansilyo, apiapis na lamisaan ya ankelag, rosrosas a papil, abel ono tinsim; nanengneng met iray abayag ya inatatol iran bandijadon kalap ya walan inpintad pegley da so ilog a melag a pakanengnengay ankekelag iran sirasirá, buaya, lukalukan, tanaman irad dalem na danum, koralis tan batobaton salming ya nambabangil a mabilabilay iran kolor. Sarayan bandijado so panginan iray tabáko, sigarilyo tan gagalen ya kinekeles day masimsimpit iran lima ray mamárikit.
Masilesileng ya napan espejoan so tablay abong; kinokortinaan iray pinto na pinya ono júsi; sinasabitan met iray dorongawan na paroparol a kalap odino papil a rosa, inanagan, malabúyong, tan ambalanga; napnapnoy abong na rosrosas tan masitas iran impapatoun ed pedistal iran kalap a nanlapod China; pati saray sasantos nanparakep met ira, saray talintao tan relikyias singa ramet mi pista, ineekalan iray dabok, pinupuna-
