kalayukoy so ugúgaw a maringot ono apilatpilat so kawes da, odinó lakseb: wala lad tay insulong toy aysing na kúya to, wala met lad tay sinoblay toy pantalón nen amá to. Kayári bandan manugtog, saramay ugúgaw ya kikalayukoy patlep da la ra may sonata, balibali lay panagtareren tan panagngisiw da, tan apilí da met la no dinan iray apaknaan da.
Mansasbí met la ran linmulugan ed karomata, kalisa, tan luganan iran marakep a nengneng, so kakanayon, kakaaro, totoo ran ag kabkabat, saray tajor ya awit da ray sankaabigan a manok dan ibubulang, tan súpot iray balitok ya sipaparaan iran mangipalaray pilak da ed lamisaay sugalan onó diad bulangan.
"Makalmoy alferez na limamploy pisos a nilabilábi!" kuay sakey a lakín matabataban pandak, ya inesaes ed saray sinmasabin tajor; "mangibangkay Kápitan Tiago; si Kápitan Joaquin nanawit na labínwalon liboy pisos. Wala met so liampó, ya poonanan nen intsik Carlos na samplon libo. Onla ra diay taga Tanauan, Lipa tan Batangas, tan sara met so taga Santa Cruz. Talagan baleg a paspasan! Et itilad abong ta mansoklati kini. Sayan taon anganko agto itayo nasimot nen Kápitan Tiago ya singa agawa nen imbeneg a taon ta taltaloray inter ton misa, insan walay anting anting na kakao ko. Antoy itsura ra balet na boleg yo ra ey?"
"Maong, maong irá ed panangasi Dios. . . . . Salamat!" kuandan inmebat iray sankaíli; "si pári Dámaso ey?"
"Si pári Dámaso mansirmon na kabuasan insan manuksok na lábi."
"Satan, kaabibigan to! No iba tayo anggapo sirin so pagpága tayon balot!"
"Talagán anggapon balot so kapagaan tayo! Wadtan nimet si intsik Carlos!"
Tan samay lakín matabataba insinyas tod lima toy singa manbibilang na kuarta.
Diad paway na báley, saray taga úma, saray kasamak insulong da met iray pipipistan kawes da ta onurong irad báley a mangitulor ed abong day ámo ra na nganak iran matatába, animolok, olsá, taén manok ya
(1) Sikatoyay kapital na luyag na Laguna, tan sananey ed distritoy Santa Cruz ed siudad na Ibale. Say Tanauan, Lipa tan Batangas ngaran iray baley ed luyag na Batangas, tan sayay onor so kapital.
