átap; wala met la ray angilugan ed kariton na itulor dan kiew ya itotungo, saray arum say inlulugan da bongabongan nambabángil ya onkanan ipising ono ipalamis, tamtanaman iran isasábit a matalag a nanenengneng, ya inaalad takel a walaray nanrosas na mababig;
wala met iray nanawit na biga ya malalápar so bulong
to tan tikastikas a nanrosas na ambalbalangan singa kolor na apuy ya ikanan parakep na pinto ray abong.
Et say kawalaay pinasian sayaksak ya ngalngalin nibaga lan guló, dimad sakey a mapátar a pásen ya asinsinger ed abong nen Ibarra. Manateet iray ayór, ingal ed biek tan biek, sankarengel so tanol na batón pípisagen ono tetemeken, say talakatak na martilyon pangipapalpal na pasak, say tanol na wasay ya pansasapsap na ikana ran lusek. Wadman iray mapalet a totoon mankokutkot na maawaawang tan araldalem ya abot; wala met iray mangidadasig na batón inaala ran tinétebag ed palandey; tan sara met so arum maneepas iray lugan day kariton iran onsásabi, sisinopen da ray bonton na dalin a nagégeray ono mangipapaálagey iray torno a panagélet ono panagputer na balatyang, tan mákina ran imomonta ed kiew ya onkanan pangialisalis na ambebélat iran mairap ya alsaen.
"Dia tan! Satan diman! Maganó!" kuan a maningal na sakey a masiken ya abebá tan mayapis a inpanlaman, a sankabenbenan ton itataktayokor so sakey a mitron inokopay gansa ed nantopag a sampot tan angiputipotay lubir a binitinay patáwin. Sikatoyay maistroy panday a tatáwagen day Nor Juan a sarag ton ami kimey. . managgaway planoy abong, manangipaálagey na abong iran binató, panday, managpinta, manangiyay talák na kapokapot, managlabray bató tan no arum met managgaway talintao.
"Nakaukolan a nasumpal ya amin natan! Nabuas ag nayari mankimey ta ngilid gáwa insan nabuas a sakey so pangikana! Gánatan yo!"
"Iyan yoy sustosuston onkáget yay tubo ed satay gagaween yon abot!" kuantod saramay pigaran managlabray bató ya lilinisan dan pasísilengen so sakey a batón baleg a kuadrado. "Ditad dalem so panginay papil ya angisulatay kangáranan tayó, ta piano miando ya ag kaney dálin."
