Tan kapag onsabin sankaíli úliten to lamet ya ibaga so amin libolibó to lan inkuan:
"Antayó no antoy ipapaálagey mi dia? Sakey ya eskuilaan ono orungan a makanan pangáligan ed abig na inkagawa to ya andi duma tod saray eskuilaan ed Alemania, mas maong ni ingen! Say nanggaway plano sikamin dua nen arkitikto ya Kagalang R. tan siak so mangikukurang na kimey. On, tua tan, nengneng yo naani no nasumpal ya, say nengneng to singa palasion duaray payak to; say pagpag ingganá ed saray ugugaw a lalaki, tan say biek diad saray ugugaw a bibíi; diad pegley walay tanamanay rosrosas ya walay taloran soból ton isibsibuag dan ipaarap ed tagey so danum; diad nantopag a diking tánemay kakiyewan a mangiter na sirum a napanpainawaan, tan wala met iray pasen ya italagán panagtanémay pisipising ta pian saray ugugaw a lalakí et makapantanem irá tan naalila daray tamtanaman da no oras iran anggapoy klasi, et agda dagdarakey panaon. Nengneng yoy kinaaralem na seminton angipanekay lusek . . . . . taloran mitro tan pitomplo tan liman sentímitro! Diad sayan eskuilaan walaray silir a panangiatólay nambabángil, walay silir ed dalem na dálin, wala met iray panangipangawan ed saray mangirás a manaral ya ipasen dimad asingsingger ed galawan ta piano saray adusa et narengel day panggagalaw tan panliliket day makulin manaral. Nanengneng yo tay makmaawang a pasen ay? Ditan ira manousilan tan manloluksoan so ugugaw pian anggapoy makabanbanet ed sikara tan andi makasanisanib ed isiplog na dagem. Saray ugugaw a bibii wala met so tanamanan day rosrosas ya inay yurongan iran bangko tan buabo, dalan a pinapagiligay kakiyewan a panggagalawan day baldo, soból a mamaarap ed tagey, pasen iran kinulong na iket ya kawat ya ayaman day manomanok, etc. . . . . Nengneng yo naani no ag marakerakep so pawayan to!"
Insan tod satan panaaplosay duan lima to nen Ñor Juan a singa to la sankanengneng so kibeliaw na ngaran to. Onpegdat iran onladmay totood arum a bansá tan arum a lúyag ya onnengneng insan dad satan tepeten:
—"Siopay makabat ya arkitekton nanggawa nia ey?"
—"Agyo amta sirin? Singa samay agyo kabat si Ñor Juan! Mapatpatnag a tuan arawi nanlapuan yo;" kuandad satay amin ya onebat.
Sikarayay kanunotan ya manaarid uló to legan ton
