basilbasil ed biek tan biek a nenengnengen ton ousisaen a maong so amin a kimey.
"Masiado met lay kinakabáleg na kiew ya inkana yod satay ipapaálagey yon pangitagey na bató," kuantod sakey a toon ampesisaw so kolor to ya mangibábangat ed pigaran mankikimey; 'no siak labat so manggawa susto lay taloran pidason kiew ya andukey a mansasangal ed tagey tan talora met ya panekang ed bandad leksab!"
"Andibáli!" kuanton may lakín ampesisaw so kolor to ya manimimis na sansananey; "lalon makatawag na imano tan mas dakel so onkelaw tan mangidayew no ankakabáleg so ikanan kiew, ta say kanengnengan to makapagiaw. 'Pinasian talagay impankimey da!' --kuandad satan. Nengneng yo la naani no nasumpal no panoy abig na ipaálagey kon pangitagey na batón iletneg tayó. Insan ko ni parakepay laylay irá tan nansosuldong a bulobulong tan rosrosas. . . . . ta piano nibaga yo met ya walay gongona yon angalad siak a mankimey, insan pati di sinyor Ibarra anggapoy barbaraan da!"
Insan manelek tan manimimis: makaimis met si Nor Juan balet ta manpeyeng.
Diad aragdawi daiset diman, walay impaálagey ya duaran kiosko ya tinekep na palapála ya tinatarongay bulong na pontí.
Samay maistro tan sakey angankon talomplon ugugaw a lalakí, manggagawa ray balanget iran bulobulong tan rosrosas, tan manpepeket iray laylaylay ed saramay maletey a lusek iran kawayan a binabaliberay abel ya ampoti ya sinasalutsot ya impapasibok.
"Isulat yoy malinlinew ira tay batek," kuanen maistrod saramay mangitatatak ed ankakabaleg iran batek na pangipatnag na maliket a pamapasabí ed saray sankailin onlad man; "onla diay alcalde tan akamayamay iran kura, nayarin onla met dian pati si Sankatageyan a Kapitan General ta wadiad luyag! No nanengneng dan marakep so impanggawa yo idayew da kayo anganko."
"Itdan da kami kasi pizarra?"
"Ngalngali! Wala la balet so inbilin nen sinyor
Ibarra ya manlapo ed Ibale. Insan nabuas walaray onsabin nambabangil ya ibonog ed sikayo ya singa upa yo bilang. . . . . Natan italem yod danum so puknel da ran tay rosrosas ta nabuas tayo ra pansisipulen, insan manawit kíni diay dakdakel ta nakaukolay akamayamay
