a pamarakep na latlamisaan ta piano maligligay sankanengneng day mangakan."
"Di amak manawit ira nabuas na dakdakel a rosas na baino tan sakey a buksot a rosas na sampaga," kuay sakey ya ugaw.
"Di amak angiakar la ra diay taloran kariton a buer et ag ira impabayaran." kuay inebat met na sakey.
"Di pangamaen ko isipan dan sikaray manuildo ed sakey a maistro," kuanto met nimay kaanakan nen Kápitan Basilio.
Makapalikliket a tuay pakanengneng ya amin la warin too, singa ra aabobonay kanunotan nen Ibarra. Si kúra ya dildíli kinerew ton sikatoy manganak tan mamindisión na pangiletneg na onaan a bato, ya gaween ya ed onor ya agew na pista tan ompasen a singa sakey ed saray sankagalangan a nagawa. Pati si koadjutor ya anta onman lan sikig to, sinmingger ed kinen Ibarra ya angibagá ya iter ton pinanagnag to so amin ya ibayar day totoo ed sikaton paimisa ya anggad kasumpal na kimey. Ontan met nen hermana Rufa ya saya may akabat tilan sakey ed saramay madadásal a bibíin mantotungtong ed silong na konbinto, ya mayamán balet ta masimpit, insipan to met a no onkulang so gastos onliber ed arum iran báley a mankerew na tulong, dapot labat ipawil day gastos tod panbaroy to tan say kanen to, etc. Akisalamat si Ibarra balet ta kuanton inmebat:
"Anggapo lan lamang so dakel a naala tayon tulong ta anggapoy selengen dan kayamanan ko, insan aliwa met a simbaan so ipapaálagey. Sakey ni agko insipan ya onkerew ak na tulong ed pangipaálagey."
Saray lalakín tubonbalo ya manaaral ed Ibale tan pinmawil iran mipista, masiadoy paneseleng dad kinen Ibarra, tan gagaween dan pangaligan da; balet ta unong ed maslak ya nagagawa no wala ray pilalek tayo ran aligen ya totoon sinmeliaw, say mabethet a naalig tayo saray gawgawa ran aliwan makana no ag ingen saray kaugsan da no arum, manlapod sikatoy nasarag tayo,
kanian karaklan ed saraman a tubonbalon mangitátagey ed sikato, say iimanoen da say panangisinger toy korbata to, saray arum say itsuray kuilyo to tan wala nira ingey bibilangen dan pati botinis na amirikana tan saliko to.
