Saray mauges ya alalem na linawa nen masiken Tasio singa kabaliksan day ambilunget a lurem a nipalir lay dagem tan inmarawi ono abuybuyak lan aminpinsan. Oniay asalita nen Ibarra ed sikato na sakey ya agew, balet ta si masiken kuanto nin siansia:
"Agyo lilingoanan imay imbaga nen Baltazar (1) ya:
No diad idateng mo et sikay abeten
Na maligan lupa ya aroy ipanengneng,
Lalon manaluar ka ta sikay igagaem ...
Si Baltazar aliwa labat lan omaanlong no agta matudió tan aralem so panagnunot to met."
Saraya tan arum nira so nagagawa ed díspiras na pista, kasakbayay iselek na agew.
(1) Si Francisco Baltazar sakey ya omaanlong a Tagalog ya inanak ed luyag na Bulacan nen a 1788 tan inatey nen 1862. Sakey ed saray marakep a gawń to say uliran a "Florante Tan Laura."
