Diad abong nen Kápitan Tiago dakdakel met so tadiá. Kabat tayo lay ugáli akanabong. Diad inkapantarol to tan pangikikinon tod kasásalita ton taga Ibále, kapilítan a palakbatan tora ed panaggastos tan panagtadiá so taga luyag. Sakey met nin makasengeg na pankapilitan ton italoná ed saray arum a totood báley ta sayan pista wadmay anak ton María Clara ya kapawapaway tod kolegio, insan wadman met so mamanogangen ton sikatoy bongay sangi amin a too. Sakey ed saray nasásalitan maong a palapagan ed Ibále, impalapag tod onaonan bolong to so sakey a sinulat a nipaakar ed Ibarra ya inngaray "!Alig yo!" ya napnoy dayew tan ontan met na bilin. Diman da tinawag na “atagey ya aral tan mayaman a tubónbalo" ontan met ya "atagey ya inkatoon maaro tan matulong ed kapara ton too" tan diad bandad leleksab tinawag met na 'saray binangatan nen Minerva (1) ya pinmegdat ed Ina tin Bansan España ya mangilúgay ed petepeteg a sengeg na kakabatan tan karakpan", tan diad sampot "say kastilan pilpino etc., etc." Diad pakababása nen Kápitan Tiago ed sarayan daydayew onsasabi met ed linawa toy malagay a pangalig tan nonunoten to no kasí ta ag met manepeg a mangipaalagey na sakey a konbinto ya gastos ton díli.
Pigay agew nid kasakbayay pista sinmasabí lad abong ton nanlapod Ibále so akamayamay iran kajon a napnapno ray nambabángil a kakanen tan alak a nan lalapod Europa, tan ontañ met na espejo ran ankakabaleg, kuadron pigára tan patí piano nen María Clara.
Si Kápitan Tiago balet sinmabí nen dilin agew na díspiras, tan nen dinmagon manpinsiw si anak to, inderew ton impaabet so sakey a marakep tan mabmablin kuintas a balitok ya sinabitay rilikarion balitok met a
(1) Diosa na kakabatan.
