binotakbutakay brillante ra tan esmeralda ya walan lugan toy melantingit a kiew a tinaping ed balotó nen San Pedro ed pasen ya nanyurongan nen Katawan tin Jesucristo ed samay agew ya impamaipelag toy iket.
Mababig so impantungtong da nen mamanogangen to ed sayan impannengneng da lamet a nanlapod samay insipot nen Ibarra ed Ibále nen agew a kasakbayay pistay inatey; tan mapilit lan atungtong day ipaálagey ya eskuilaan. Say labay nen Kápitan Tiago ingaray "Eskuilaan nen San Francisco."
"Manisia kayo," kuanto; "maong a patron si San Francisco. No ingaran yoy "Eskuilaan na Instrucción Primaria, antoy naala yo ey? Siopa ta tay Instrucción Primaria a?"
Diad saya sinmabí ray pigaran amimiga nen Maria Clara, tan intagar dan ompasiar.
"Balet ta agka manbabayag," kuanen Kápitan Tiago ed kinen anak to nen sinmingger yan manpatánir; "amtam la mandem diay pári Dámaso ta kasabisabí to natan."
Insan pinmigar ed Ibarra ya saya so singa ameneng, tan inkuanto:
"Mandem ki met la diad sikami ta kabukbukoran yod abong yo."
"Balibali komon, balet ta nakaukolan koy ompawil ta ompano walaray onsabin sankaíli," kuanen Ibarra ed makalnan bosis to, ya agto sineléng si María Clara.
"Awit yo lara diay kakaáro yo, masulosulok met sa tadiá mi," kuanen Kápitan Tiago ya amagamaga: "sakey ni labay ko met komon a makapanpulángan kayo di pári Dámaso. . . .
"Andibáli ta masulosulok ni panaon!" kuanen Ibarra ya makaimis na imis balet a pinaspasout, tan nanparaan met lan mangolop ed saramay mamárikit.
Inmakseb lara ya pinegley nen Victoria tan si Iday si María Clara tan manumtumbok si Tía Isabel.
Saray totoon nalálabasan da magalgalang iran ompapaliis a mangipalugar na dalan. Si María Clara makapakelkelaw ed kalimgasan to. Anggapo la may kolor ton amespesiaw tan anggaman saray matá to et siansia ni ran singa sinonunot, saray marakep a bibil to balei
lawas iran manimímis. Manlapod malikeliket, napno met na ligan mangibabáno ed saray kabkabat to lan sipor a nanlapo nid inkaugaw to, ya amamayoen da natan so
