kabat ya anganggaay sasalitaen da et manok ya ibubulang tan nipis."
Sinmegep irá tan asabi ran napnoy tooy salas. Walaray sinmingger ya angilúgay ed Ibarra, ta amin a wadman et kabat day ngaran to. Nanaayapan iray totoon manaamayo ed kalimgasan nen María Clara, tan saramay wadman ya akukulaw a manggagagal "Singa Virgen!" kuandan mansalsalita.
Impan soklati da ran pilit tan pinakan da ray ipapangan. Nanlapo lad samay agew na piknik si Kápitan Basilio aliwa labat lan malet so impikaaro tod Ibarra no ag ta idadayew ton lanang ed amin a too. Akábatan tod samay pisag na telegrama ya nabtangan nen anak ton Sinang a rigalo nisengeg ed impakala toy sankakapoyan a ebat ed pantetepet dad samay libron Dalig na Kapalaran, ya amtalá nen Ibarra ya análo ed samay asunto ra, tan manlapod agto met labay so paisúri ed kalalágak, ipapasouton lingoanan da la may salitaan da nen manggalaw iray ajedrez. Ag onabuloy balet si Ibarra kanian say anunotan to so say pilak ya ibaya to komon, ikana lan iter a suildo na sakey ed saray manbangat dimad ipaálagey ya eskuilaan. Nisesengeg ed saya ipapasout tod saray arum a totoon kabkabat to va wala ray asunto rad panagokoman a mas maong no isuner da la.
"!Manisia kayod siak!" kuanto, "diad kolkolan anggapoy gonggonay manalo; naandian na pati aysing to." Anggapo balet so napanisia to ya anggaman naynay ton bitbitlaen ya ipapanunot so napno ray kálor a salsalita ray inmoná ran makabat a totoo ya taga Roma.
Kayári ran nansoklati di María Clara agnira akasipot a tampol ta pinasumpal da ni may organista ed. saman a baley a manotugtog na piano.
"No narerengel kon manotugtog ed simbaan," kuanen Sinang ya inturó to, "makasásayawak; natan balet. ta manotugtog na piano onsasabi gustok a mandasal. Kanian labay koy mila ed sikayo."
"Labayoy miolop ed sikami naani no lábi?" inesaes nen Kápitan Basilio ed layag nen Ibarra nen saya et ompapatanir. "Manoksok si pári Dámaso."
Akaimis si Ibarra tan inebatan ton inggalaw so uló to a nayarin italus ed "on" nayari met ed "andi".
