"Siopa tan ay?" kuanen María Claran tinepet ed kinen Victoria ya insinyas toy matá to so sakey a tubonbalon balolakí ya ontutumbok ed sikara.
"Satan ay satan ay kapinsan ko," kuay ebat nen Victoria ya singá agagá
"?Satay sakey ay ey?"
"Satan agko kapinsan," kuanen Sinang a tamtampol; "anak di paginaen ko."
Linmabas irad arap na konbinto ya agmet ya saginunor ed sayaksak. Ag apokpokan nen Sinang so impakaeyag toy daiset ed gaway kelaw to ed impakanengneng ton manlangalang iray silew, lamparaan irayan nanlapo la rad ona ni ran panaon ya ag iran balot paseselselan nen pári Salví pian ag manggastos na petroleo. Dengdenglen so ingal tan elek iran manlaldak, tan sankanengneng iray papári ya akarakar a matantantan ya ikomkompas day uló ra tan tabakon ankakabaleg a mabmabli ya sankatangal da. Saramay arum a totoon wadman aaligen da met so galagalaw da ran may papári tan napatnagan ed akasolong ed sikaran kawes ed Europa ta empliado ra odino makauley irad lúyag.
Abirbir nen María Clara so matimtimpek ya impanlaman nen pári Dámaso tan say asimsimbang ya inalagevan nen pári Sibyla. Wadman met si pári Salví ya mabinbinta ngola tan ag onggalagalaw ed yurongan to.
"Nanaermenan!" kuanen Sinang; "Say nonunoten ton tan say gastosen tod pansankaíli to. Balet ta nengneng yo, aliwa lan lamang a sikatoy manggastos no ag saray sakristan to. Sakey ni agtora papakáney sankaíli to, say pangakanan da et diad arum ya abong!"
"Sinang!" kuanen Victoria ya bináno to.
"Agko naanosan nanlapod impamilat ton may Dalig na Kapalaran; agko la pankokonpisaran."
Diad saray kaabongan walay sakey ya ambilbilunget tan akakapot a pati saray dorongawan to, -- samay abong nen alférez. Nikelawan si María Clara.
"Abong nen ibáwanen! Samay inngaran nen masiken Tasio na Musa ray Guardia Civil!" kuan lamet nen Sinang. "Anto tay pibibiangan tod panliliket tayo? Manbuburorot anganko! Nengneng mo, no walay salot na kólira sikatoy pankonbida ton tan a panpakan!"
(1) Sukey ed saray diosa ya ipapasen day totoon inmona ya manangiter na puyan tan bolaslas na kanunotan ed panagsulat na anlong tan angatagey iran kakabatan tan aaralen a marakep.
