“!Agay la yay Sinang ay!” kuan lamet neng kapinsan to.
“Anta kagkaingungot ko lan sipor, lalon alour so petang na uldk ed sikato nanlapod impanggulo tod samay piknik tayo nen imbaki to ramay Guardia Civil to. No Arzobispo ak labat panasawaen ko ra nen pari Salvi ..... !Nengneng mo no anto ray ompaway ya anak da! Akaramdamag ka lay papaerel to may pangaskasiyan a piloto anta saman ya abig ton too ya tinmaboy kalamor ed danum lapod pamagusto to labat.......... ”
Agto la nisumpal so ibabaga to ta atawag so imano ra ed nagagawad mad sakey a suyok na plasa ya kawalaay sakey a bulag a mangitgitaran kakantaen toy panaaroan day sisira.
Wadmay sakey a laki ya nantakokoy balbaleg tan kawes toy sankamasegsegangan. Nan amerikanay agilaygilay tan nansanual na lapaklapak a singa sanual day intsik ya apilpilat met, tan inapisan to ray sail toy sandalian nagagaygay. Ag namurian maong so lupa to ta nasasanibay takoko, balet ta no arum napasikmatan so mata to ran singa ondalang et itewek to ran tampol. Atagey, tan nanengneng ed kagagalaw to ya ugaw ni. Igaton toy awit ton babako ed dalin insan to paliisan ya mansalsalitay sansananey iran tanol ya ag natalusan. Manalalagey ya akabiibiig a singa to ra met papaliisay totoo unong na ipapaliis daraya ed si kato. No naarawian to la may babako to, wala rad satay onsingger a bibii ya napelag so panangasi rad si kato lagi tan inan da may babako toy bongabonga, sira, niloto tan bengat lad tan a napanbilay. No anggapo lay onsingger, onsalita lamet ed maerermen a bosis ya pisasalamat to lagi, ta agmet natalusan, dagoen to lan aleen ed satan imay babako to, insan la onarawi tan onman lamet so gaween to ed arum a pasen.
Linmiknad kinen Maria Clara ya walad may kasegsegangan tan tinepeto no siopa man.
“Saman imay toon akating,” kuay ebat nen Iday. “Apat taon lan ontan to; kuanday arum ta naalisan ed impangiwi tod ina to, walara met so mangibaga ya nala to ed impanayam tod pangawan a maremes tan ambetebetel. Diman manaayam ed uma ed asingger lad panangipunponan day intsik. Anggapoy sisinggeran
to tan papaliisan met na amin a too ta antakut day na
