álisan. No nanengneng mo labat so ayaman to! Singa samay abong nen Giring-giring; abutawbutaw, payagpayag iray dingding to, ya ontutubong so dagem,
uran, may agew. Sinebelan dan mandiwit na anggan antotan a kagawaay arum a too. Sakey ya agew, walay ugaw a naplag ed banawang, aliwa met ingen ya aralem et lapod nibanan onlalabas, inibaan ton inaon imay ugaw. Nen akabatan nen ama, nandalem ed kinen Kápitan, tan saya impasikdakan ton aminem ed pegley na lansangan insan pinoulay inpanlewet ed sikaton babuyan. No anengneng mo labat, makapagimlit na bagó! Manbagtik ed lansangan ya ousilan dan sisikdakan, insan maningal si Kápitan."
"Panmarmarán mo! Magmaong ni nalener nen say nasakitan a singa sika!" kuanto.
"Sian tua!" kuanen María Clara ya makalkalna. Tan singa agto naamantaan so ginawa to ya masigsiglat a sinmingger ed samay babakó ton may akating tan inggaton tod dalem imay relikario ya kagkapangipaabet nen ama to ed sikato.
"?Antoy ginawam?" kuanda ran may amimíga to.
"Anggapo met so arum ya awit ko!" kuanton inmimis a impanisimula toy lua to ran tinmerter.
"?Antoy gaween tod samay relikariom ey?" kuanen Victoria. "Sakey ya agew walay angiter ed sikatoy kuarta et agto inalá, inarawi ton intolak na kawayan, ta, antoy gaween to met a tua ey, et anggapo met so mangawat na anggan anton manlapod sikato? No napanbilay komoy relikario magagana!"
Si María Clara ninengneng ton napnoy ibeg iramay bibiin manlalákoy nambabángil a kakanen, insan to sinintak so abalá to.
Saman balet so akating dinago to may babakó, dinemet to may relikario ya kinmidiam ed lima to, tinmalimokor, inangoban to, inekal toy takokó to insan to indapdap so muling tod man ed dabok a ginatinan nen María Clara.
Saya sinaniban toy lupa toy paypay insan to impunas so panyolito ed matá to.
Diad saya nitan lay sakey a biin sinmingger ed samay akating a wadmanin mantaltalimokor a singa
mandarasal; samay bii buskag so buek ton andukerukey ya agotgut tan atilitili, tan diad liwawa da ran
