may parol dimad plasa, nabirbir ni anggaman onman lan nabnabengan ya lupa nen Sisa.
Kalikas nen akating ya walay amenben ed sikato akaeyag tan biglan inmalagey a linmokso. Samay ambagel balet impuger tod taklay, ed baleg a inkataktakot day wadman a totoo, tan inkuanto:
"Mandásal itayo, mandásal itayo, ta natan pistay inatey! Saratay nanenengneng yon silew ay sikara tay bilay day totoo; ibaan yoak ta idasalan tayo ray ánako.'
"Pansian yo ra, pansian yo ra, ta naalisan itay ambagel!" kuanday totoon maningal balet ta angga- poy ontalek ya onsingger.
"Nanengneng mo man ay so silew ed tori? Si anakon Basilio man ya onkakaruskos ed lubír! Samay silew dimad konbinto ay ey, nanengneng mo met? Saman balet si anakon Crispin, agkora balet napinengnengan ta agmakayári kúra insán akamayamay so pilak tan balitok ya onza, insán irá nababalang. Idasalan tayo met so kamarerua nen kúra! Yaawitan kon lanang na palia tan arum niran pisipising, say tanamanan ko napnoy rosas, insán walay duaran anako. Walay tanamanan ko, aasikasoen ko ray rosrosas, tan walay duaran anako.
Insánto inikbanan imay akating tan inmarawi lan mangakantay onia:
"Walay tanamanan ko, manaasikasoak na rosrosas, walay duaran anako, tanamánan ko tan rosrosas!"
"Anto lay agawaan mon nipaakar ed saman a pangaskasiyan a bii ay ey?" kuanen María Clara ed Ibarra.
"Anggaponi, ta naandipat met ed báley ed sarayay imbeneg ya agew ay, ya anggapoy makalmod sikato!" kuay ebat nen Ibarra ya singa agagá. "Sakey ni masiadoy karakel na gawak, balet ta agmo paneermenan; insipan nen kúra ya tulongan toak, inbilin to labat ya agak manbengatbengat, tan manlikas ak a ma- ong ta singá akalamit irá amoy Guardia Civil. Agka labat mapága ta masiado met so pilit nen kúra ya makatulong ed sikato."
"Agta man inbaga nen alférez ya paanap to ra may ának to?"
"On, balet ta nen ibaga to amó et . . . . akainom!"
