met a pári Hernando de la Sibyla, tan ontan met nen masimpit ya kúra ed Tanauan tan arum niran kakastila. Diman mi anengneng so aliwa labat lan alabas a panaggastos tan abig na panamili ray akanabong, a mataltalag yan naalmo ed saray tagá sayan bansá, no agta diman kami met naayapan a nanamayo ed sankalimgasan tan mayaman a tomatawir na akanabong, ya impatnag ton
sakey ed saray matalonán manotumbok ed Santa Cecilia ed impanugtog ton agay lay abig tan dakep ed
mabmablin piano to, ya diad impandengel ko et anunotan koy nibantog a Galvez tan saray nababalitan tugtog ya gawa ra ed Alemania tan Italia. Agay met la, ya sayan nagnagnap a marikit et ontan lan mapaabebá ya agtora ipaparungtal no agta yaamot tora ingen so kablian to tan pakapangidayewan ed sikato ed polok day katoowan a manaarid liknaan day dayew dad sikato.
Nepeg ko met dian salitaen ya diad sayan abong et pinapainom da kami champaña tan ankabli ran alak a nanlapod Europa ya sawasawaan ed ontan lan karakel ed kabat lan sipor ya lágay na pananankaíli mayaman ya akanabong.
"Ninmengneng kamí ed sarsuila, tan kabat yo met la ray pinmapaway irá ya di Ratia, Carvajal tan Fernandez; sikami labat balet so akatalus ed saray kaabigan da ta saray karaklan anggapoy akatebek. Maong so impanganta nen Chananay tan si Balbino anggaman apagás iray daiset: sayay unor sinmekiaw na daiset so bosis ton aminsán, balet ta no aleen lad amiamin, anggapó met lay barbaraan, ginawa da met lay anggaay nayarian da. Saray indio, lalo lay Kápitan, apakpaknaan dan maong so sarsuilan tagalog a tatawagen day "Moro-moro"; sayay unor panaaplosan to ray lima to ed liket to, tan inkuantod sikami ya kawkawanan lan agda impibakal so prinsisa ed samay álan ya angibatik ed sikato, ta no ginawa ra ya mas marakep ni komon so pinmaway lalo la no si álan et ag nasugatan ed iner man a pasey lamán to likod labat ed puseg, a singa si Ferragús ed "Oliran Day Doce Pares." Si magalang a pári
Dámaso ed kabat lan sipor ya abig na linawa to, inabobonan toy kaisipan nen Kápitan ya kuanto nin impatumbok ya no ontan konoy agawa, talagan antá nen prinsisay gaween to piano napunta toy puseg nen álan a diman to duyeken a páteyen.
