"Agko la nakaukolan dian ibagá ya legay sarsuila anggapoy kinolangay panangasikaso tan pananankaíli Rothschild a pilipino; manbabáles ya ipakan tan ipainom day sorbitis, limonada, alak tan arum niran panagtimpey na erás. Aderlaw na amin ya wadman so ag impakadagop nen balitado tan atagey ya aral a tubonbalo, a si Kagalang Juan Crisóstomo Ibarra ya, unong na amta yo la sikatoy mangipangulo nabuas na pamindisión na onaan a batón iletneg a pangigapoy marakep a eskuilaan ya ipapaálagey ton lapod panangaro tan pananulong tod saray kabaleyan to. Sayan simit tan sibual day Pelayos tan Elcanos (ta naamtaan kon sakey ed saray láki tod amá et taga Baybay ono Amianen na España ya sakey lágid saray akaonan kaolop nen Magallanes (2) ono Legaspi) agmet anengneng a sanagew ta singa mauges so laman to kanian ag akalasor. Balet ta say ngaran to bongay sangi ray katoowan tan kapag bitlaen da tekep toy dayew, panangidayew irá yan diad magter kon pakaisip et makapangitanduro ray galang na España tan amin day petepeteg a kakastilan singa sikatayo ya bibirbiren tayo lawas so dalá tayo anggan anto may akilaokan to.
"Sayan kabuasan na komalabinsakey ya agew na Nobiembre binmuskag ed matá mi sakey ya anengneng a makapasibeg na linawa. Sayan agew unong na kabat lay amin a too, pista na Ina tin Virgen ed Kareenan tan saray mangipapanguloy pamagalang ed Sikato saray Hermanos na Smo. Rosario. Nabuás balet sikatoy pistay San Diego ya Patron ed sayan báley tan onsublay iran mangipangulo so Hermanos na Venerable Órden Tercera. Sarayan duaran togiop singa ra manlalaglagan ed panangiparungtal na panangaro tan panagsirbi ed Dios, a mabetbet a sayay pansengegay pansisiblangan da ya unong na agáwa ed sayan pista nen nansamsaman day bantog a maong a mansirmon ya andi arum no ag si magálang a pári Damaso, ya sikatoy mansirmon nabuas, tan amin day totoo singa da la tatalaranan yan sirmon a diad pakaisip da et aliwa labat ya ompaway a makabaliksan a sirmon no ag met sakey a marakep ya inkasalita.
(1) Milyonarion tagá Inglaterra.
(2) Balitadon managsakay a taga Portugal a sikatoy inmonaonan akaliber ed mundo tan sikato met so akalmo ed Pilipinas.
