Unong na asalita lad inmona, abantayan mi sakey a nenengnengen a makapaabig na walna tan ontan met a makapasíbeg. Anemiran papárin tubonbalo, ya talora ed sikara so manbasay misa, tan talora so onkanan acólitos, nitan la ran pinmaway a nanlapod sakristia tan tinmalimokor irad arap na altar; si pári Hernando de la Sibyla inggapo tod satan a kinantay Surge Domine ya panangigapoy libot ed dalem na simbaan, ed tibukel tan marakep a bosis to ya tekep toy asimsimbang tan mabinbintan awey to ra ya pangagalangan ed sikatoy karaklán. Kasumpal na Surge Domine, si Kápitan ya akakawes na frac a sankabenbenan toy guión (1) tan tumtumbokey apatiran acólitos a nanawit na panagpasob, inggapo toy libot. Diad beneg da manomtumbok iray nanegnay ciriales, saray empliado ed munisipio, saray marakep a inkagawan talintao nen Santo Domingo, San Diego tan Virgen ed Kareenan ya kinakawesay rason binorbordaay balitok, a sayay unor nanpandong na mabmablin sutlan inanágan a binobutakan tan ginigi. ligay pilak ya inanos ed balitok, a rigalo ya nen masantos ya nankápitan, Kagalang Santiago de los Santos, a too yan sankanepegan ya idayew tan aligen. Amin irayan talintao inlulugan iran sansasakey ed karron pilak. Diad beneg na Inay Dios manomtumbok kamin kakastila tan saray arum a papári. Si pári Salví walad silong na palio ya bebenbenan day pigaran anak-banwa, tan diad kaonoran so kawalaan day sankakanaan a Guardia Civil. Isipen kon agla nakaukolan ya ibagá dia ya ag nabilang ed onman lan karakel so indio ran akilibot, ya akadasig irad nantopag a diking day talintao, ya sankaegnaan dan maraldalit ed lima ray kandilan sinelselan. Saray banday músiko manotugtog iray madios iran martsa; manlaldak iran mangilulúgay so bomba tan koitis a ginagawan singa dalig ya apuy. Makaayayap a peteg so paninimaton ed ontan lan kaabebay linawa tan dálit ya itatatak da ra nian napapalabas a gáwa ed kapusoan day katóliko, say malet tan mabilay a pananisia ra ed Virgen na Kareenan, say kabintaan tan tagey na dálit a panamalábas tayo ra nian magalang a gawa, na amin tayon mapalar a nianak ed silong na masantos tan ag ataldengan a laylay na España.
(1) Singá bandiran pilak ed onaay palio.
