"Kayári líbot, ginmapoy misa kantada ya kinompaniaay orkista tan angantá ra may pumapaway ed teatro ya abitlak lad onaan to nia. Kasumpal na Evangelio, sinmegep ed panagsirmonan si magalang a pári Manuel Martin, Agustino ya nanlapod lúyag na Batangas, tan legan ton nansirmon makenekeneng iran nantalineng so totoo, ya aliling day manbitbitin ed salita to, lalo la ray kakastila ta inggapó tod salitay kastilan napnoy bayáni, malinlinew tan naknakna so impangiparungtal toy kanunotan to, ya pinarlang tan pinadálit toy kapusoan min nandengel. Sikaraya sirin a salita so manepeg a pangibalikas na liknaan tayon nipaakar ed Ina tin Virgen tan say pinablí tayon España, lalo la nimet no nayarin isaletsalet ed sasalitaen, ta manlapo lantí ed makalakalat, so saray kanunotay sakey a prinsipi na Ina tin Santa Iglesia, si magalang a Monecillo (1) ya sikarayan anggapoy duarua so kanunotan da met na talba ray kakastila.
"Kayari misa, sinmegep kamin amin ed konbinto ya kaulop mi ray totoon walay kanengnengan ed báley tan dia kami sinankaíli nen Magalang a pári Salví na unong ed bantog lan bonlok na pananankaíli to, ya wadman ya akatadia ray tabako tan nambabangil a nengneng na kakanen ya imparaan na Hermano Mayor ed silong na konbinto ya pantimpey day makaliknay isabi eras da.
"Sanagew ya ag angariay liket tan anggapoy kinmulang ed kitutuloy na naugaliyan a ligsá tan savaksak day kakastila, ya diad oniaran papalabásen et agda napokpokay inkasikará ya nibesngaw dan nipanengneng ed kankanta onó sayasayaw, odino bengatlan antokaman a gawgawan napanpalabasan ya ag naliklikas so oras, ya say kapusoan ed pagew da et magalang lawas tan masekder ya ag irá napatolok na ermen, ta masulosulok lay panbabanarad sakey a pasen na taloran kastila ya makapabtik diman na kaermenan. Diad saman ya agew apagalangan si Terpsicore (2) ed pigapigan abong, nagkalalo la ed ayaman nen milyonarion pilipino ya atagey ya aral ya angonbida ed sikami ya mandem ed saman a
(1) Antolin Monecillo, cardenal a kastila ya nibantog nisengeg ed malet ya insungpa to ed Cortes nen 1869 ed sakey a parti na balon insulat ya Panagtuntonay Uley a yaaboloy toy pankanawnawan panpili na labay a Religion.
(2) Diosay sayaw.
