pilosopoy ag angoman so itsura to; sikato ni man ya aysing ton “sinamay” a gulisay magket ya akabotonis ya
anggad beklew, sapatos ton maawang tan ontan met na
malapar so payak ton sombriro ton fieltro ya kolor na
dapol.
“Lalon maermen so pakanengneng kod sikayo natan!” kuanen teniente mayor ed sikato. “Akin, agyo pa lagi labay a manliliket itayon tonggal paminsan ta ontan la lanti karakel na nepeg tayon nangisan?”
“Say manliket aliwan kabaliksan toy manggaway kalokoan!” kuay ebat nen masiken. “Sikato layay kaambagelan a gagaween tayon tinaon! Ya an to bilang so makasengeg ey? Dadardarakey kuarta anta ontan lan karakel na kasegsegangan tan pankaukolan! On, natalusan ko met ingen a nakaukolan yan tanol, gulo, tan lambak pian natabonay eyey na katoowan!”
“Kabat yon peteg ya ontan met so panagnunot ko,” kuanen Don Filipon inmebat a singa mabinta, balet ta imisan. “Ginawak so anggaay nayarian ko, balet ta an toy pakayarik ed kinen Kapitan tan si kura ey?”
“Nayarian yoy mandimiti!” kuanen pilosopo insan la inmarawi.
Agagay Don Filipo, tan ag akasel, a pakpakndyutan toy matay masiken.
“Mandimiti!” kuanton meremere ya mamapaarap ed simbaan, “mandimiti! On, no komon ta say bebenbenan kon betang et makapangiter na kagalangan ya agko sasakbaten a singa krus a balatyang, on, mandimiti ak!”
Napnapnoy tooy patioy simbaan: lalaki, bibii, ugugaw, mamasiken ya akasulong na kawes iran pipipista, wadman iran nanlalaok, ya onloob ompaway iran manpipitpitan ed mainget iran pinto. Nanlalaok met so angob na polbora, rosrosas, pasob, tan balingit; manbabansag iran manlaldak so bomba, koitis tan bibintarol ya agda napokpokay pakalokso, pakabatik tan pakaingal daray bibiin natataktakot, ed baleg a elek day ugugaw a manbabantay, lalo la ra may dilin manseselsel na bibintarol. Say sakey a banda mantotugtog ed arap na konbinto, saray arum inolop da ray empliado ed munisipio tan manliliber irad kalansanganan a pinaparakep na akamalagaygay ya ontan lan karakel na laylay. Liwawa tan kolor iran ag nankakalatan so makatataligay-
