gay na mata ed amin a pasen; maananlay iran tugtog
tan tanol so narerengel. Anggapoy tonday kalangakang day kampana. Mantutumbokan tan mansasabatan
iray pigapigan nengneng a luganan day mangayaman
tan saray kalisa, ya no arum, nataktakot iray kabayo ed
onman lan tanol tan onlokso ran manalagey a mansuner
ono mandiplat, ya anggaman anggapo yan inbilang ed
saray ipapaway, panmamaliwan toy sakey ed saray
nenengnengen a makatawag na imano tan anggapoy
bayar.
Say Hermano Mayor ed sayan agew imbaki to ray igaganggan ton mansabat ed lansangan na totoo ran bagaan a pakanen a singa ginawa ton may toon angiter na pista nen inmonan panaon, a sasalitaey Evangelio. Paspasouten la ray toon bagaan a painomey soklati, kapi, tsa, tan panmasimiten ono pakaney ipapangan tan arum niran kakanen; tan mabetbet ya wala lay kulkolan no ag ira makapantatalusan.
Asingger lan igapoy misa mayor, misan tatawagey dalmatica ya singa samay misan agawa karoman a sinalita tod sulat ton may sumusulat ed palapagan; sa balet so manmisa natan si pari Salvi tan diad saray mimisa walan nibilang si Alcalde ed luyag a kaulop to ray akamayamay a kakastila tan arum niran totoon atagey ya aral a pinegdat dan dengeley pari Damaso ta balitado lantid luyag a maong a mansirmon. Si alferez a dildili, anta ontan lay kadederia tod panagsirmon nen pari Salvi, dinmagop met a pangipanengneng toy abig na linawa to tan pilalek to met ya ondengel na marakep a sirmon a pakabawiyan toy kakaalipanesan to no si kuray mansisirmon. Ontan lay inkibantog na abig na panagsirmon nen pari Damaso ya samay sumusulat et onia lay insulat tod manangikurang na palapagan anta agto ni nangel:
“Agawa so unong na impasakbay ko lad sikayo ed sulat ko karoman. Nibiibiig a kapalaran mi so impakangel mi sirmon nen magalang a pari Damaso Verdolagas a kura nen saman ed sayan baley, balet ta nialis ed baley a mas baleg a pinagkatumang day kimey to. Sinmegep lanti ed panagsirmonan so kabat tilan balitadon maong a mansalita, tan nansirmon na nagnagnap ed abig tan napnoy araldalem iran kanunotan ya aliwa
