Napnapnon pinasiay simbaan, pasen ya tatawagen day totoo na abong na Manamalsay sansinakoban.
Saray totoo mantutulakan ira, manpipitpitan ira, mandedeldelan ira, ya manayay lara no arum ed kasasakitan da ray pigaran ompapaway tan ontan da met iray akamayamay nin ontutubong. No arum, arawrawi ni ra, younat da lay lima ran igagawat ya idelnet ed panaminditaan, balet no arum agda nisabi tan makaarawi ni ra ingen a nitolak iray kibolobol a totoon singa ra daluyon ya onsasabi; diad satan walaray kilaramurum, wala lad tay biin agatinan so sail to ya makaayew, balet ta sigen anggapoy tonday deldelan. Walaray mamasiken ya no nidelnet da kalamor so limara ed samay agua bendita ya kolor lay pitek ta nanorasan lay amin a tood ba ley ya andibali ni ray akamayamay a dinmagop a sankaili, anggaman marmairap dan isabi lima ra ed gaway letletan day totoo, ikarapas da ed tagey na tenger da, toktok, muling, eleng, baba, pagew tan angga hi ingen ed puseg, ya napno ray pananisian diad pangawa ra nia napasantos da ra yan pasen na laman da, ag ontalker so beklew da, ag ira mansakit na tisis, tan bengat lan kaderal na eges. Saray tubonbalo, lapo lagi ed aliwa ran masakit odino agda pa lagi sisisiaen a makaamper na sakisakit imay agua bendita, samet da idiwit so sampot na tamoro ra — ta pian anggapoy nibaga ray totoon masasantos — tan konwarin idenet dad muling anta agda met isabi. — “Tua ta bininditaan” kuay sakey a marikit lagi ed nunot ton dili, “balet ta, agi, andekereket lad dingot... !”
Ngalngalin ag ira makalinaway totoomasiadoy petang, insan anapakseng a linget,so nanaangob; balet ta
