nayari labat ya ompatey iray espiritu. Sayan makapakelaw a pinalsay Dios, sayan makapakebiew ed pakapanyari, andi arum no ag si mapalar a Diego de Alcala,
ya no abuloyan yoak a mangipara ta say pangipara et
lawas makaiba ed pakatalus na bengatlan mairap a talusan, ibagak dia ya sayan baleg a santo na simbaan,
sakey labat lan abeban sondalo, sakey bilang a komikimey ed mabiskeg a togiop mi, ya ouleyan nen Ama
min San Francisco ya maniapod tawen, togiop mi ya
napagalanganak a sakey ed saray mimomoyong ed kipapasen ya kabo ono sargento bilang, ed sankabalgan
a panangasi Dios.”
Saramay ag akaaral ya indio ya unong na kuanen sumusulat ed palapagan, anggapoy atalosan dad saman a dukey na impansalita nen pari Diimaso, likod labat ed guardia civil, tulisan, San Diego tan San Francisco; naimano ray inbilunget na lupa nen alferez, tan ontan met na mapasang ya itsura nen mansisirmon, tan pinetek dan si pari mamapasnok ed kinen alferez ta saya et agtora eerelen so tutulisan. Maong met sirin kuanda ed nunot da no akauley laran mangerel di San Diego tan si San Francisco ya unong na anengneng da ed sakey ya inpintan walad konbinto ray paparin pranciscano ed Ibale ya si San Francisco et pinaer ton binaat so isasakbit day intsik a pamakal tan iloob ed Pilipinas nen inmona ni ran panaon, diad impangipaayag to labat na balkes ton lubir. Akaliket iran maong tan akisalamat iray baleg ed Dios ed sayan tulong, ta anggapo lay duaruwa ra ya no napaandi la ray tutulisan, et isoblay ira balet nen San Francisco ya paandien met so guardia civil. Ontan ya dinoblian day dalit dan mantatalineng ed kinen pari Damaso ya saya intuloy toy nansalitay onia:
“Sankatageyan a sinyor: Saray ankabaleg tan makabaliksan a nagagawa, lawas iran ankabaleg tan makabaliksan ya anggano yampai’ ira ed saray andi kakanaan ono aliwan makana, tan ontan da met na aliwan makana, siansian andi kakanaan da ya anggano idasig irad saray makabaliksan. Sikatoyay ibabagay Awaran, et maniapod say Awaran et mabetbet a nalingo “ya maminpinsan ton napuntay pasak tan maminlasus so pakakena tod sapatos na kabayo,” ta gawa met lanti na saray totoo, tan saray totoo et mabetbet iran nalingo, errarle
