pangiter niray sakit: say akanabong agto pansásakitay uloy kaabigay laman day binabagaan to no agta say nonunoten toy kaperay liket na linawa tod kagawaan iran mablí. "Makapataktakut so disenteria, balet ta onyurong kayod ankakabaleg tan inaapisay makakapal, yurongan iran nanlapod Europa tan agyo nagawaan itan ya inagewagew!" kuanto lági.
Napno lawari tooy pegley na abong: saray lalaki akabiig irad saray bibii singa diad saray simbaan a katóliko tan diad saray simbaan day judío. Saray wadman a mamárikit pigaran pilipina tan pigara met ya española. Manubuwab lára, balet ta tampol a saniban day sangi ra na awit dan paypay; ag ira oneseesel tan no nibanan walay onsalita, mataltalag tan makalkalna; antoman ya igaporán tungtong manpultot tan makatonda ya aliling day tanotanol a narerengel ed abong no lábi ya taltalokatik na utot tan tikitikí. Saraman pa lági nambabangil a talintaoy Katawan tin Sta. María ya insasabit ed dingding so makasengeg na deedeen da tan agda masmaselan, odino idumaduma ray bibi: dia?
Say mamaparawes ed saray bibii sakey ya akulaw ya kapinsan nen Kápitan Tiago ya maulimek so lupa to tan pikewet so panangastila to. Anganggad amta ton panankaili so mamagagal tan mamatabako ed saramay española tan manpapinsiw ed saramay pilipina a singa gawaray papári. Apastidio met la lági kanian sinambot toy walay alarakarak a naksit a lipong tan pinmaway a magangganat a kuanto:
"Jesus! Alagar kidtan mumúan!"
Tan agla pinmawil ed loob.
Diad polok day lalaki mas so tanol. Diad sakey a sukong wala ray pigaran manaaral a mansondalo ya maligligsay tungtongan da anggamán makalna, tan no arum sankanengneng daray pigaran kataod man ed salas a no maminsan ituró dani ray tamuró, insan ira manelek a yaamot da balet na anggaay nayarian da. Wala met so duan kataon taga arum a bansa ya akakawes iray ampoti, nankurosay lima rad beneg da tan mamaspasiar iran andi esel dimad salas manlapod sakey a sampot ya anggad biek, a singa gawá ray nanaaboridon manluglugan ed ankabaleg a sakayan. Amin a sayaksak
