ed kamarerua, inpiernos, say “mahal na santo pintakasi,”(1) saray indion makasalanan. tan saray masurin
paparin Pranciscano.
“Diablo!” kuanton may ag mangitaltalek a taga Ibale ed samay iba to; “singa salitay griego tan ed siak, anggapoy natalusan ko, onlaak la.”
Tan maniapod akakapot ya amin iray pinto, binatak toy altar a dinmalan ed sakristia ya ontan lay inka eskandalo ray totoo tan si parin mansisirmon, ya saya pinmesiaw so lupa to tan akatonda ed pegley na ibabaga to; walaray tatalaranan dan ingalan nen pari Damaso ya pantamian, balet ta saya agla inmesel, pinaknuyotan to labat na mata, tan intuloy toy pansisirmon to.
Impatumbok nen mansisirmon so nambabangil a pauges ed onkukurang a panagbilay ed tapew na dalin, tan ontan met ed kakulangay panaggalang, tan ongagapon yaandi religion ono pananisia ed kapusoan. Singa sikato yay kalabian ton salitaen ta mabisbiskeg so linawa ton mansasalita ya malinlinew iray panangibaga toy kanunotan to. Sinalita to ray makasalanan ya ag mankukonpisal, ya ompapatey irad pangawan ya agda nanaawat so unor iran sacramento, saray boleg ya inayew, saray mestizon atagey a linawa ya anganggad aasikasoen day postura ra ya maselselkag tan mapinepineng iran lanang a singa ag natoonay apangat so kawes da, saray tubonbalo ya mankabatkabatan, filosofillos, abogadillos, estudiantillos, etc. Kabat lan peteg so kagagawa ray dakel a totoo ya no wala ray labay dan balawen et isamsampot da ray salsalita ra ed illo ya pangipatnag day panludlurey tan panmurmura ya sikatoya labat lagi nagawat na utek da, tan diad pakagawa ray onia et singa lara malikeliket.
Amin iraya narerengel nen Ibarra tan natatalusan toy paspasiki ra ed sikato. Popukpokan toy inkasikato ya ipapatnag ton singa anggapoy wala, tan saray mata to singa ra aanapen so Dios tan saray mamakauley, et bukor labat na wadman a nanenengneng so talintao ray sasantos tan si Alcalde ya nalalapat.
Mantuloy liket na linawa nen mansisirmon. Ipapanunot to ray inmona ran panaon ya no saray pilipino
et makasabat iray pari, ekalen day sombriro ran mangigalang ira, italimokor day sakey a pueg da insan ira
__________
(1) Say masantos a Patron.
